ORANJESTAD, Aruba – 11 di februari 2021: Den e tempo aki di pandemia, e maneho di gobierno ta pa brinda mas tanto asistencia posibel na esunnan den un situacion cu nan no por a premira. Nan a cumpra auto, cumpra un cas, a haci un fiansa personal y awo nan ta confronta cu nan entrada a bay atras.
Nan ta biba di FASE, loonsubsidie of ta traha den sector hotelero y no ta haya tip mas. Nan entrada a bay atras. Minister di Husticia, Siguridad y Integracion, mr. Andin Bikker, a indica cu Gobierno a bin c’un plan di maneho intensifica. Asina e mandatario a traha riba un pre-concepto di ley pa bin cu ayudo di maneho di debe, esta ‘Landsverordening schuldhulpverlening’.
Aparte di esey, pronto ta bay trata adaptacion di e Codigo Civil di pais Aruba. Ta anticipa riba e maneho menciona y lo bin cu un nota di cambio, unda cu articulo 431 di buki 1 di Codigo Civil ta bay haya un cambio den dje. E cambio aki ta e introduccion di bewindvoering, un tipo di proteccion pa personanan cu tin debenan problematico of no por controla nan debe.
E concepto aki ta existi na Hulanda caba. E mandatario na diferente ocasion a splica cu e leynan di Aruba ta basa riba concepto Hulandes, pasobra tin un Corte Comun comparti cu Corsou, St. Maarten y islanan BES, tambe tin un solo Corte Supremo pa henter Reino Hulandes. Articulo 39 di statuut ta bisa cu e leynan mester ta concordante. E huesnan cu sea a studia na por ehempel Aruba, Corsou of Hulanda, asina tin un referentie kader ja cu e leynan ta similar y nan por administra husticia na un forma mas efectivo.
E nota di cambio aki ta e prome paso hopi substancial pa por cuminsa brinda e ayudo cu pueblo ta pidi den e tempo di pandemia aki pa loke ta trata maneho y proteccion di debe. Ta premira cu otro siman lo trata e concepto di ley, unda lo presenta e nota di cambio.