Home Corte Tata y mama cu a abusa di nan yiunan menor di edad...

Tata y mama cu a abusa di nan yiunan menor di edad condena na 7 y 4 aña di prison

SHARE

 

ORANJESTAD – Awe mainta, sentencia a cay den e lamentable caso di abuso di muchanan door di nan mayornan.

Aruba Native por a compronde cu via video conferencia, Hues a bisa e homber T. y e dama V. cu e ta haya nan culpable di a abusa di nan yiunan menor di edad. Luna pasa tratamento di e caso aki a tuma lugar caminda tanto T. como V. ta desmenti categoricamente di a abusa di nan yiunan.

Fiscal a bisa cu e ta haya legalmente proba cu T. y V. a abusa di nan yiunan y un otro mucha mas. Fiscal a tene cuenta cu psycologo ta haya cu T. ta menos responsabel pa su actonan y a exigi 8 aña di prison mientras cu pa e dama V., el a exigi 6 aña di prison.

Awe mainta den sala di Corte tabata presente e mama di V. y e ex señora di T. E acusadonan tabata den un oficina na KIA, mientras cu den sala di Corte tabata presente Hues, Fiscal y abogado. Hues a cuminsa cu e homber T. Hues a bisa cu e ta haya legalmente y convicentemente proba cu T. a comete actonan sexual cu un mucha menos cu 12 aña y un mucha entre 12 y 16 aña. Tin diferente declaracionnan cu ta mustra esey. Hues a menciona 5 persona y hasta e raport di dokter. Hues a sigui bisa cu ta mas cu 1 biaha e abusonan a sosode.  El a mustra cu actonan asina ta hopi serio y ta afecta e muchanan.

Pa cu e castigo, Hues a tene cuenta cu e raport di psycologo cu ta mustra cu T. ta menos responsabel pa su actonan. Hues a condena T. na 7 aña di prison, kitando e tempo cu e ta sera den KIA. Pa loke ta e dama V., Hues a bisa cu tur e pruebanan cu el a menciona, ta conta pa V. tambe. Hues a bisa cu V. a yuda T. ora T. tabata haci e abusonan.

Hues a bisa cu e ta tuma V. na malo cu como mama di un mucha asina jong ta laga su pareha haci actonan sexual cun’e.

Pa cu e castigo, Hues a bisa cu V. su funcion ta menos y a conden’e na 4 aña di prison. Por a mira cu e mama di V., cu tabata presente den sala di Corte, tabata haci expresionnan di satisfecho cu e castigonan.