Municipio di Camargo, Estado Tamaulipas, MEXICO-
12 agente policial deteni riba sospecho di ta envolvi den asesinato di 19 persona.
E curpanan a wordo haya 22 di januari, despues di un yamada anonimo bisando cu tin dos truck kima den un area conoci pa contrabando di hende y droga, na e municipio Camargo, estado Tamaulipas, cu ta keda cerca di e frontera cu Estados Unidos.
E 19 curpanan tabata tin herida di bala, probablemente nan lo a fayece prome, door di e impactonan di bala. Despues nan lo a wordo hinca den e trucknan y kima.
Despues di e descubrimento autoridad a cuminsa cu un investigacion cu a conduci diaranson 3 di Februari na detencion di 12 agente policial. Nan ta wordo sospecha di tin di haber cu e asesinato di e 19 personanan aki, mal uzo di poder y pa duna declaracionnan falso.
E curpanan a keda identifica, tur ta personanan procedente di Guatemala, un di e victimanan ta un hoben futbolista di 22 aña, cu ta hunga pa e team Juventud Comiteca.
Tur e victimanan ta procedente di Guatemala, for di un area cu a keda hopi afecta pa e crisis ocasiona pa Covid-19.
Entre e victimanan tabata tin un conocido contrabandista di hende. E investigacion a sigui y no ta descarta e posibilidad cu mas detencion lo por cay.
