ORANJESTAD – Awe mainta, Corte di Husticia a sigui cu tratamento di e caso penal contra e resto di e grupo di 11 sospechoso haya riba e barco Aressa cu mas cu 5000 kilo di cocaina.
ArubaNative a informa ayera cu 6 sospechoso a presenta caminda Fiscal a exigi pa e capitan Z.D. 15 aña di prison, pa e hefe mecanico M.D. 9 aña di prison y pa e resto di e grupo D.Z., N.M., T.B. y A.M. 12 aña di prison.
Awe mainta e resto di e grupo, e hombernan V.R., N.M., Z.G., V.L., y D.M. nan caso a wordo trata caminda Fiscal a baha pisa riba nan tambe.
Fiscal a bisa Hues cu e lo haci un resumen di loke el a papia Diahuebs. E ta haya cu tin suficiente prueba cu V.R., N.M., Z.G., V.L., y D.M. ta culpable. El a bisa Guarda Costa a haya tip di Marina Colombiano y asina a intercepta e barco Aserra. Den cuarto di machine a haya den un tanki e 211 bultonan y cada un tabata yena cu pakinan di cocaina. E grupo tabata abordo di e barco. Fiscal a mustra riba declaracion di e sospechoso M.D. kende a bisa con tur cos a sosode. Nan tur tabata sa di e traficacion di droga y a haci esaki pasobra nan tin debenan pa paga. Tabatin discusion cu e capitan Z.D. pasobra promer a palabra di trafica 1 Ton pero despues esaki a bira 5 Ton.
Pa cu e castigo, Fiscal a bisa cu e ta tene cuenta ta promer biaha cu nan ta cay sera. El a bisa cu ta promer biaha cu tin un caso di 5000 kilo di cocaina. Tabatin caso di 3000 kilo. Fiscal despues a bisa Hues cu e ta exigi 12 aña di prison pa tur cinco sospechoso.