Home Advertorial CMB: Anuncio Importante na fiel comerciante y doño di tarheta bancomatico di...

CMB: Anuncio Importante na fiel comerciante y doño di tarheta bancomatico di CMB

SHARE

Apreciable y fiel comerciante y doño di tarheta Bancomatico di CMB,

Recientemente nos a tuma nota cu un banco local a publica algun ponencia fuerte pa loke ta trata con transaccionnan di pagonan local di nos tarheta di debito Bancomatico ta wordo procesa como un transaccion na dollar Mericano na nan machine di pago. Por fabor permiti nos e oportunidad di clarifica nos posicion y cualkier confusion cu esaki por a causa.

Na aña 1995 y pa evita cu pagonan cu tarheta di debito wordo pasa via un red internacional manera cu e banco referi na dje ta haci, un red di aprobacion y confirmacion di pago a wordo introduci cu yama “CashNet.” Pagonan haci riba e red aki ta wordo procesa rapido y sigur, di florin-pa-florin, sin ningun cargo adicional pa acceso na un red internacional y/of gasto pa cambio di moneda. Cu excepcion di e banco na cual ta referi, tur otro banco local ta afilia y ta usa e red local aki na nan terminalnan di pago sin gasto adicional na nan clientenan cu tarheta di debito.

No obstante esfuersonan haci e ultimo 25 aña cu a pasa pa e banco local aki uni su mes na e red local, nan a opta pa keda afo y sigui comberti pagonan local di florin na dollar Mericano riba nan red internacional basa na Merca.

Durante añanan, nos a promove varios campaña di mercadeo unda nos ta encurasha nos doñonan di tarheta di debito y crebito di CMB pa haci pagonan solamente unda tin machinenan di CMB. Nos a haci esey tambe pa duna balor agrega na e relacion cu nos tin cu bo como comerciante y doño di tarheta.

Nos ta orguyoso y agredecido di por confirma cu CMB, como bo banco, tin e red di mas extenso di comerciante afilia, variedad di tarhetanan di debito y credito di mas amplio, cu mas terminal di pago, machine di ATM, machine pa yena gasolin, cantidad di sucursal, y e cantidad di mas grandi di clientenan di tarheta di debito y credito riba nos isla.

Den liña cu un mandato cu ta regula cu tur pagonan local sin importa cu esaki ta local of internacional (sea ta florin-pa-florin of converti di florin-pa-dollar Mericano) mester woro procesa igual, nos lo ahusta nos sistemanan di pago di acuerdo cu esaki.

Nos ta gradici bo pa escohe nos, y tambe pa confia nos cu bo negoshi.