WASHINGTON – Presidente Mericano Donald Trump a bandona Cas Blanco rumbo pa Florida. Mas laat durante dia e Democrata Joe Biden lo wordo huramenta como e di 46 presidente Mericano.
Trump y su casa Melania a subi e helikopter Marine One, cu a hiba e pareha na e base militar na Maryland. Eynan nan lo aborda Air Force One cu lo hiba nan Palm Beach na Florida, na unda Trump tin su hotel Mar-a-Lago.
Vicepresidente Mike Pence no tawata presente pa despedi di Trump. Contrario na e situacion tradicional pa e ultimo 150 aña, e presidente saliente no lo asisti na e inauguracion di su sucesor. Pence si lo asisti na e inauguracion di Biden.
Na Trump su yegada un grupo di empleado y ferviente sostenedornan tawata wardando ariba dje. Su famia tambe tawata presente.
Den un discurso cortico el a gaba su propio gobernacion di e 4 añanan cu a pasa y a duna su mes credito pa e desaroyo rapido di e vacuna contra coronavirus cu segun e, a plama rond mundo pa via di China. El a menciona tambe cu di un manera of otro, pronto e lo bolbe. E no a menciona Biden ni a papia tocante e sucedido di 2 siman pasa na Capitol.
