DEN HAAG – „Ningun hende kier un toque de queda”, asina prome minister Rutte a bisa durante conferencia di prensa. Toch e gabinete demissionario kier pusha pa un toque de queda, algun dia despues cu Tweede Kamer debati tocante esaki. E recomendacion pa bishita na cas a wordo limita di 2 pa 1 persona pa dia.
„Esaki ta un medida pisa cu ningun hende ta contento cune.” Rutte a bisa. E medida aki lo bin solamente si Tweede Kamer acorda esaki. E medida aki lo wordo implementa algun dia despues di e debate, si e haya suficiente sosten.
E prome minister a avisa, cu e ora no lo ta permiti pa ta riba caya entre 8.30 di anochi y 4.30 di mainta. „Esaki ta conta tur caminda, den ciudadnan y pafo di esakinan. Pa por haci excepcion, bo mester di un declaracion.” Esnan cu no respeta e toque de queda lo haya sin ningun aviso un boet di 95 euro. Rutte a haci yamada na tur hende pa haci compras tempran pa no mester di ta riba caya anochi.
Motibonan valido pa ta riba caya durante toque de queda ta:
* Pa busca ayudo medico pa un hende of bestia.
* Pa asisti un hende cu mester di ayudo, incluyendo mantelzorg.
* Pa saca bo animal domestico pafo pa haci su necesidad.
* Aparece dilanti un hues, fiscal, bezwaar- of beroepschriftencommissie.
* Trabou: Esnan cu mester sali anochi pa bai trabou mester di un declaracion di nan doño di trabou. Esnan cu ta deliver cuminda y esnan cu ta asisti na un talkshow ta cai den e categoria aki. Un declaracion no ta necesario pa personal di brandweer of ambulance y chauffeurnan di truck.
* Bai of bin bek for di exterior.
* Calamidad.
Tambe pa entiero lo tin medidanan mas estricto. E cantidad maximo di hende ta wordo baha di 100 pa 50.
Ta spera cu e implementacion di e toque de queda aki lo ocasiona un rebaho di 8% den e reproduccion di e virus. E toque de queda ta un medida extra cu lo mester frena sobre todo e variacion Britanico di e virus.
E mensahe aki ta scur, pero e perspectiva no. Rutte a mustra ariba e aceleracion di e campaña di vacunacion. Contra di e recomendacion di e fabricante, Hulanda lo bai alarga e periodo entre e prome y e di 2 dosis di e vacuna di Pfizer 3 pa 6 siman. Di e manera aki un gran cantidad di Hulandes lo por tin caba algun resistencia contra e virus. Actualmente e di 2 dosis ta kedando den freezer te ora cu yega su momento, pero en bes di esaki, mitar di esakinan lo wordo uza como prome dosis pa e grupo di 60-plus.
Segun Rutte Hulanda lo sali for di e problema aki. El a adverti di un posibel tercer ola. „Nos mester haci nos best pa pospone esaki y minimalise mas hopi posibel.”
Segun e organo do conseho pa bringa e pandemia, na maart 2021 casi tur resultado positivo lo bin di e variacion Britanico of Sur-Africano, cualnan tin un grado halto di contagio.
Kiko mas lo bin? Casi sigur lo bin un cuarentena pa viaheronan cu drenta Hulanda. Pa esaki ainda e leynan necesario mester wordo traha. E toque de queda casi sigur lo wordo implementa diabierna caba, pero ta posibel tambe cu esaki lo bira te despues di weekend. E gabinete kier ta sigur cu e tin suficiente sosten di Tweede Kamer. Esaki lo debati diahuebs tocante e medidanan mas estricto. E sosten aki no ta sigur ainda.