31 di December,
Semper fin di aña tin hopi cos ta pasa, cosnan tristo, tragedia etc. E biaha aki Arubanative.com a compila algun suseso cu a yega di sosode na Aruba riba 31 di December.
Bo tabata sa cu riba 31 di December 1950, Aruba tabata tin solamente 53.205 habitante
31 di December 1951: Cas a kima por completo
Den Kloosterweg, actualmente Dominicanessestraat un di dos casnan pega na otro (dubbelwoning) di palo a pega candela, polis y brandweer a trata tur manera di scapa e cas, pero e candela feros a destrosa e cas di palo y tur locual tabata tin aden por completo. Brandweer pa e candela no expande y kima e otro cas na banda a muha esaki cu awa. E cas cu a kima tabata di cas di juffrouw Duverdi.
31 di December 1963: Un cabayero di fam Flanegin di Sabana Grandi a fayece na e kemaduranan serio cu e la ricibi e dia anterior.
Diadomingo 30 di December un polis cu a caba di traha a scucha cu un homber lo kier a cende su curpa na candela, mesora e la bay pero ya a topa cu e persona na candela. E persona a basha kerosin riba su curpa, a pasa man pa swafel y a cende su curpa na candela. Mesora nan a tira un deken riba dje y a hibe hospital. Su situacion tabata hopi critico un gran parti di su curpa tabata kima y pa su mañan e la fayece.
31 di December 1969: Un barbero rabia a bay los algun tiro pa spanta un grupo di mucha y a tire den su pia.
Durante dia for di trempan un grupito di mucha basta hoben tabata pasa dilanti di e barbershop den playa y tabata tira klapchi den e barbershop. E barbero a cansa di e wega aki y na dado momento e barbero a dicidi di bay cas coi su revolver y los varios tiro den direcion di e grupo di mucha, cu e intencion di spantanan bek, pero pa su mala suerte un di e muchanan a ricibi un impacto di bala na su pia.
31 di december 1975: Dos candela enorme a domina tur noticia e dia aki
Riba e ultimo dia di 1975, e edificio di FICA y La comunidad a keda completamente destrosa pa candela.
Dia 31 di december 1975, den oranan di mainta alarma a wordo bati pa un candela feros den e oficina y warehouse di Farmaceutische Import Centrale Aruba (FICA) den Nieuwstraat.
Muy probablemente kortsluiting tabata e motibo di e candela. E candela lo a haci un daño di mas di 250 mil florin (e tempo ey). Den careda di 4 ‘or di marduga vlamnan feros di candela tabata sali for di cu e edificio FICA, especialmente for di e warehouse unda tabata warda un cantidad di remedi. Na yegada polis y brandweer a nota cu e candela a domina e edificio por completo caba.
Aparentemente e candela a cuminsa despues cu e anochi anterior tres biaha coriente a bay y esaki lo a afecta e airco cu mester a keda 24 ora pa dia cendi, pa e remedinan cu nan tabata tin warda den e warehouse aki. FICA a perde tur e remedinan cu nan tabata tin warda den nan warehouse.
Den careda di 7 ‘or y mey di anochi un biaha mas brandweer mester a sali pa un candela grandi. E biaha aki tabata trata di e warehouse di e negoshi La Comunidad cu tabata situa den J.G.Emanstraat, den e warehouse aki nan tabata warda vuurwerk. Probablemente e candela a cuminsa door di cendemento di vuurwerk. E daño tabata grandi, no solamente daño di candela pero tambe hopi daño di awe.
Pa colmo e hoogwerker di brandweer na momento cu e tabata bayendo patras di La Comunidad, e la dal contra e gevel di Hotel Centraal y a ocasiona daño eynan tambe. A dura mas cu un ora pa Brandweer por a domina e candela, polis no a cera e camindanan y mironesnan tabata obstaculisa trabou di brandweer.
31 di December 1976: Candela grandi den Nassaustraat, ( Caya G.F. Betico Croes actualmente)
Diabierna 31 di December 1976, den careda di 12’or y 45 a drenta un informe na polis cu e fabrica di refresco Aruba Bottling Company den Nassaustraat ta na candela. Mesora a manda brandweer na e sitio, como 6 truck di brandweer a bay na e sitio pa combati e candela. Den mas o menos un ora nan a logra domina e candela por completo, brandweer a keda te 5’or di mainta pa caba di spuit y kibra partinan di e edificio cu lo por tabata forma peliger. Door cu brandweer a actua hopi lihe e parti di dilanti so a kima, pero e parti patras cu e bijbouw nobo a keda intacto.
31 di december 1978: Chinesnan residencia pa prome biaha a celebra cambio di aña segun nan tradicion
Pa prome biaha cu e chinesnan residencia na Aruba a mustra Aruba con nan ta celebra cambio di aña un show tradicional tabata tin den cayanan di Oranjestad.
Den oranan di anochi prome cu mey anochi nan a haci full un show cu a hala atencion di hopi hende na Aruba. Un grupo di Chines a subi caya cu nan musica y bailando cu nan dragon. Nan a pasa den e cayanan di Oranjestad, gastando asina miles y miles di florin tirando vuurwerk. Na dado momento nan a pone e dragon riba vloer y na boca di e dragon nan a pone un baki cu varios cosnan di nan creyencia. E tabata un show hopi bunita cu ta den exterior so ta wordo haci pero e 31 di december 1978 Aruba tabata testigo di e bunita tradicion Chines.
