Medidanan di TDQ no ta mustra di a cay den bon tera cerca algun persona.
Ariba rednan social por a mira varios persona expresando nan desapobracion, disgusto y rabia pa e medidanan cu a wordo anuncia durante e conferencia di prensa di Gobierno pa Minister President di Aruba Sra. Evelyn Wever-Croes. Diamars mainta a anuncia varios medida pa asina preveni mas contagio di COVID-19. A anuncia tambe cu toque de queda (TDQ) lo bay ta na vigor atrobe.
E medida lo ta vigente desde 30 di December pa 3 di Januari, TDQ lo ta entre 11:00 pm pa 05:00 am. A informa tambe cu dia 31 di December pa 1 Januari TDQ lo ta entre 02:00 am pa 05:00 am. Despues di e noticia aki hopi persona, particularmente esnan mas hoben, a expresa riba Facebook y Twitter con disgusta nan ta cu e medida aki. Hopi musico y organisadornan di fiesta tambe a expresa frustracion. E opinionan di e hobenan mastanto tawata indica cu e TDQ lo stroba persona di sali o atende fiesta te mainta.
Nos por a lesa riba Facebook con a manda menasa di kima o tira MP, cu miho MP ‘cana cu body guard prome nan mat’e’, y otro menasa serio mas. E menasa fuertenan aki den direccion di e mandatario a wordo tuma na serio y actualmente tin un investigacion andando riba esaki. Entre menasa tambe tawata tin persona pidiendo pa no obedece TDQ y pa tur hende subi caya pa motibo cu ‘no tin suficiente cel na Aruba pa cera tur hende toch’. Esaki lo por wordo considera ‘opruiing’, cual tambe ta algo cu ta contra ley.
E decision pa introduci TDQ ta uno cu a ser sosteni pa e profesionalnan di crisis team. Durante December por a mira hopi fiestanan clandestino cu a wordo organisa. Sin menciona fiestanan priva organisa na casnan di famia unda cu tambe tawata tin aglomeracion grandi di persona. Riba e posternan di fiesta ta menciona (teoreticamente) cu e reglanan di DVG lo wordo sigui. Pero den practica esaki a resulta otro, riba e videonan publica pa esnan cu a atende dicho fiesta por a mira masa grandi di persona sin mondkapje y cu no tabata mantene e distancia social for di otro.
Na e momento aki COVID-19 a causa morto di 49 persona na Aruba. Esnan cu a recupera algun ainda ta sinti sintoma di cansancio, dolor di cabes, perdida di holor y smaak, sintimento di debilidad muscular, problema cu rosea, y problema cognitivo. COVID-19 ta un virus nobo y no algo pa subestima. E populacion di Aruba ta uno conoci pa tin basta caso di pashent di dialyse, persona cu diabetes, persona cu presion halto o persona cu cancer. Sin menciona tur e otro enfermedadnan cu por afecta e sistema inmunologico di un persona.
Pues tin hopi persona cu ta vulnerabel pa e virus, y cu kizas lo no por sobrevivi esaki o cu lo por recupera, pero si kedando cu otro enfermedad cronico (p.e. asma o problema di curason). Sin medida pa preveni mas contagio di e virus e comunidad Arubiano lo mira un perdida grandi di bida di ser humano. Si duna e virus libertad pa plama na un forma incontrolabel Aruba su cuido medico lo yega na un punto unda no tin espacio mas pa yuda persona.
Si laga e virus plama sin control of proteccion pa e pueblo, hopi famia lo mira tragedianan nunca prome bisto. E sacrificio cu mester wordo haci cu medidanan manera TDQ ta uno pa proteha bida humano y pa segura cu nos por sobrepasa un di e etapanan mas dificil cu civilisacion moderno a experiencia.