Pampuna: den su temporada, facil pa cushina y cu hopi beneficio pa nos salud!

Aruba ta den temporada di yobida. Esnan cu ta planta por saca hopi beneficio di e temporada aki. Un berdura cu sigur ta florese den e dianan aki ta pampuna. Na diferente cas rond di Aruba por wak mata di pampuna ta rama y ta duna su fruta. Ban probecha e periodo aki pa come mas di e berdura saludabel aki.  

Den e informacion aki IBiSA kier comparti un receta di carni stoba cu pampuna y un receta di sopi di pampuna hopi simpel y facil pa prepara. Ademas di ta relativamente barata, dushi y facil pa prepara, pampuna tin un cantidad grandi di nutriente cu ta hopi importante pa nos salud tambe. Mas motibo ainda pa probecha di e berdura local aki.

Beneficionan di pampuna pa nos salud!

Pampuna ta contene pa cup mas of menos 50 caloria, 1.8 gram di proteina, 12 gram di carbohidrato y 2.7 gram di fibra.

Locual ta trata vitamina y mineral, pampuna ta contene un cantidad asombroso di vitamina A (703 microgram pa cup). Esaki ta 78% di e cantidad cu bo mester pa dia. Vitamina ta importante pa nos sistema inmunologico, bista y cresemento di celula. Pampuna ta un bon fuente di vitamina C, un cup ta contene 13% di locual bo mester pa dia, y potasio (1 cup ta contene 12% di locual bo mester pa dia). Mescos cu vitamina A, vitamina C tambe ta hunga un rol importante den nos sistema inmunologico. Ademas vitamina C tin un rol den yuda cura herida y proteccion di nos celnan. Potasio ta yuda tur caminda den nos curpa, for di mantene e bon funcionamento di e riñon, musculo y curason te na monitoria e reaccion di nos nervionan.

Pampuna ta contene tambe poco zink, den un cup ta contene 5% di locual bo mester pa dia. Zink ta yuda e funccion di bo sistema inmunologico y bo metabolismo. Banda di esakinan e ta yuda e curpa crece y desaroya, cu ta importante pa hende muhe na estado y mucha. Informacion saca for di National Institute of Health (NIH)

SOPI DI PAMPUNA SIMPEL

INGREDIENTE (PA 4 PERSONA)

1 cuchara di azeta di oleifi extra-virgin

1 siboyo grandi corta na bloki 

4 tenchi di conoflok corta chikito

4 liber di pampuna

4 cup di bouillon di galiña of di berdura traha sigun e instruccion riba e paki

Salo y peper na smaak

1/2 cup di lechi evapora (lechi bleki pa koffie) of pa menos vet por uza lechi halfvol.

PREPARACION

1. Keinta e azeta di oleifi den un wea di sopi riba candela mediano. Agrega siboyo y conoflok y cushina te ora nan bira licht bruin. 
2. Mientrastanto ta casca y haci e pampuna limpi y ta cort’e den bloki.
3. Pone e pampuna y e bouillon den e wea. Lag’e herbe sin tapa. Ora e herbe baha e candela y lag’e herbe poco poco. E pampuna ta cla ora bo hinc’e cu forki y e ta moli. Esaki ta tarda mas of menos 30 minuut.
4. Kita e wea for di candela. Si bo tin un ‘staafblender’ por blend e mesora. Si bo kier blend e den un blender mester warda e sopi fria poco. Blend e sopi te ora e bira manera cuminda di baby. 
5. Mescla e lechi aden y agrega peper na smaak. Si mester salo por agrega esaki tambe.
6. Sirbi e sopi cu pida stokbrood integral getoast na banda.

CARNI STOBA CU PAMPUNA

INGREDIENTE (PA 6 PERSONA)

1 liber di carni stoba

1 cuchara di azeta di oleifi of canola

1-3 cup di awa

¼ pida promenton cora

1 tomati grandi, corta na bloki

4 pida pampuna, sin casca y corta na pida

1 batata, sin casca corta na bloki chikito

1 batata dushi, sin casca corta na bloki chikito

1 siboyo grandi corta chikito 

2 repi selder, corta fini

2 tenchi di conoflok corta chikito

Salo y peper na smaak

Nootmuskaat, peper, comino

PREPARACION

• Corta e carni mas chikito

1. Pone un wea keinta cu azeta. Hasa e carni te ora e bira bruin. 
2. Agrega siboyo, conoflok, promenton, tomati, selder y hasa nan pa 5 minuut. Pone awa acerca. 
3. Lag’e stoba riba candela abou te ora e bira moli of uza un wea di presion (pressure cooker).
4. Agrega batata, batata dushi y pampuna. Stoba pa 10 minuut mas.
5. Sirbi cu un salada di berdura, aros bruin of pida funchi.