Home Politics Prome Minister Evelyn Wever-Croes: Como simbolo di desaroyo y crecemento economico,...

Prome Minister Evelyn Wever-Croes: Como simbolo di desaroyo y crecemento economico, PROME MINISTER TA PLANTA MATA DEN CADA DISTRICTO RIBA SU FECHA NATAL

SHARE

Diasabra 5 di December, Prome minister Evelyn Wever-Croes a haci aña. Manera a bira un costumber bunita, e dia aki pa Prome Minister no ta pasa voorbij sin cu e ta haci algo special y simbolico den comunidad. Añanan anterior cu 2020, Prome Minister a organisa eventonan pa nos muchanan sea ta na scol of den forma di evento. 

Aña 2020, pa motibo di Covid, no ta un aña pa celebra pero si un aña pa duna un contribucion na futuro desaroyo di nos pais. Asina tambe a nace e idea pa hunto cu DOW planta un mata di fruta den districtonan na Aruba. Esaki no pa solamente den futuro goza di e fruta dushi y saludabel cu esakinan lo bay brinda, sino tambe lo keda como un simbolo di desaroyo y crecemento economico den cada districto di Aruba. 

 

Tambe, ta importante pa conserva nos planeta, y nos por yuda door di planta mas tanto mata posibel. E siguiente matanan di fruta a wordo planta na e diferente districtonan: MFA Noord, Macapruim. MFA Paradera, Mispel. MFA Sta Cruz, Tamarijn. MFA Savaneta, Mango. Hulp Bestuurskantoor SN, Casho.

 

“Cu esaki mi ta desea di enfatisa e importancia pa hunto lanta bek nos economia. Plantando cada mata fisico y simbolicamente y duna speransa cu ta hunto nos lo sali for di e crisis aki y nos lo sali mas fuerte. Esaki no ta dia pa celebra, sino un dia pa conscientisa. Y ohala cu e matanan aki por duna bunita y dushi fruta y pa nos semper recorda loke esaki ta simbolisa, cu ta e desaroyo economico den cada districto di nos pais. Ohala cu esaki por bira un tradicion na Aruba: planta un mata riba fecha natal”, Prome Minister e expresa.