Den cuadro di dia Internacional di Derecho di Mucha, ariba 21 di november a tuma lugar e final virtual di e Unicef ‘Kinderrechten Filmfestival Cariben’ 2020. Na e final virtual di e Unicef ‘Kinderrechten Filmfestival Cariben’ 2020 a participa Curacao, Bonaire, St. Eustatius, Saba y Aruba cu un short film.
Door di e Pandemia di Covid-19 e no tawata facil pa tur isla sigui cu e proyecto manera tawata planea for di inicio. Esey tawata e motibo cu St. Maarten no por a graba un short film y Aruba no tawata tin un final entre e scolnan na Aruba mes. Di e cinco scolnan di Aruba cu tawata participando na Unicef ‘Kinderrechten Filmfestival Cariben’ 2020, Cacique Macuarima School a logra graba su short film y asina aki a logra representa Aruba durante e final.
Despues cu e alumnonan ariba e islanan di Reino Hulandes a ricibi les tocante Derecho di Mucha, a traha un pintura tocante di Derecho di Mucha y finalmente a traha un short film tocante un di e Derechonan, ariba 21 di november e short filmnan di cada isla a competi contra di otro.
E alumnonan di Cacique Macuarima School y nan docente a sigui e final virtual di e Unicef ‘Kinderrechten Filmfestival Cariben’ 2020 for di e studio di Telearuba. Primeramente e director di Fundacion Telefon pa Hubentud Aruba James Sneek a yama e muchanan bon bini. Despues e alumnonan di Cacique Macuarima School a haya un mensahe di video for di su Excelencia Gobernador di Aruba Alfonso Boekhoudt. Sigui pa un show di baile di Skol di Baile Diana Antonette, Sneaks & Beats y Teatro di Danza Arubano. Pa 3:00 di atardi a bai den contacto cu Rotterdam Hulanda pa asina aki sigui e final virtual.
Aruba a ser representa pa Cacique Macuarima School cu e short film yama ‘Pause’. ‘Pause’ ta bai tocante articulo 27 di e Tratado Internacional di Derecho di Mucha cu ta trata e Derecho ariba alimentacion apropia y di tin un nivel di bida adecua pa asina por desaroya. E pintura di Alyscha Kock di Cacique Macuarima School tawata e base pa e short film ‘Pause’. E filmcoach cu a crea e script y e short film hunto cu e alumnonan ta Ephrayim Odor di Chahmi Films & Bad Publicity Ent. Ephrayim Odor a ser asisti pa Armando Goedgedrag di Artmando Multimedia.
E otro short filmnan cu a participa tawata ‘Freedom’ di St. Eustatius, ‘Un miho bida’ di Bonaire, ‘Gameshow T&T’ di Saba y ‘A Better life’ di Curacao. E premio di ‘Best Child Rights Story’ a bai pa Cacique Macuarima School di Aruba. Curacao a gana e premio pa e ‘Best Actor’ y e ‘Best Movie’. ‘Best Drawing’ a bai pa St. Maarten y ‘Best Argumentation’ a bai pa St. Eustatius.
Unicef Nederland y Fundacion Telefon pa Hubentud Aruba kier a gradici e alumnonan di Cacique Macuarima School, Colegio Santa Filomena, International School of Aruba, Reina Beatrix School y Scol Paso pa Futuro pa a participa na e Unicef Kinderrechten Filmfestival aki na Aruba.
E muchanan di Cacique Macuarima School ta contento cu nan premio. Tambe nan ta manda un palabra di pabien pa tur e islanan di Reino Hulandes y sigur na e ganadornan.
Pa mas informacion tocante Unicef Kinderrechtenfilmfestival 2020 por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: [email protected] of telefon 5886138.
