Home Local Aruba Tourism Authority ta sumamente contento cu Aruba lo conta cu un...

Aruba Tourism Authority ta sumamente contento cu Aruba lo conta cu un vuelo adicional for di Newark cu e aerolinea Jetblue

SHARE

Diasabra ultimo den oranan di atardi a tuma lugar e vuelo inaugural for di Newark Liberty International Airport. E aerolinea Jetblue a extende su servicionan cu e ruta nobo aki  cu ta un di e cuatro rutanan cu lo wordo opera cu e Airbus A320 ofreciendo e Mint service. 

Jetblue desde 2006 ta un socio importante y strategico pa cu crecemento di Aruba su turismo cu diferente gateways for di Merca pa Aruba unda nos isla ta un di e destinacionan clave. Durante 2019, Jetblue a trece un total di 254.635 pasahero pa nos destinacion, cu ta 22.8% di tur bishitantenan pa Aruba. Cu esey nan ta un di e aerolineanan cu ta transporta mas hopi turista pa nos isla. Entre e lunanan di juli pa october 2020 por menciona cu Jetblue a trece un total di 16.850 pasahero pa Aruba cu ta alrededor di 21.5% di e total di “market share” pa e lunanan ya menciona. 

 

“Durante e crisis debi na e pandemia aki ta momentonan cu mas nos ta aprecia e apoyo di nos socionan y ta agradecido cu Jetblue a identifica Aruba como un mercado cu potencial pa demanda. Aruba Tourism Authority y socionan sigur ta trahando rigurosamente pa reconstrui nos industria di turismo. Un di nos metanan principal ta pa segura capacidad aereo y lo sigui hasi nos maximo esfuerso pa Aruba sigui wordo posiciona como un di e destinacionan preferi pa turistanan for di Norte America” CEO di Aruba Tourism Autohrity – Ronella Tjin Asjoe Croes a comenta. 

 

E vuelo adicional aki sigur lo contribui na e demanda cu tin for di e estado di New York y New Jersey cu ta e estadonan mas importante pa cu e mercado di Merca. Manera ta conoci e estadonan aki consistentemente ta estadonan cu “market share” di mas halto pa cu e mercado di Merca cu ta alrededor di 32% den 2019 y 34% den 2020. E vuelo adicional conhuntamente cu e opcion di Vault test cu a wordo introduci algun siman pasa lo sigur contribui na hasi Aruba un destinacion mas atractivo y sin duda lo pusha demanda pa nos isla. 

 

Pa medio di esaki kier a felicita socionan y comunidad en general cu e logro grandi aki pa cu Aruba. Nos tur mester ta orguyoso pa cu e confiansa brinda na nos isla especialmente den e momentonan aki cu mundo henter ta pasando aden. Tambe kier a gradici Ministerio di Turismo, Aruba Airport Authority, AHATA, representantenan internacional y local di Jetblue pa tur e esfuersonan hasi pa e gran logro aki pa Aruba. 

 

###