Erick Laurence, un persona cu na aña 2015 a haci un operacion di Gastric Bypass ta preparando hopi duro den e ultimo lunanan pa e reto nobo cu e la pone su dilanti.
Na aña 2015 Erick no por a pensa cu un dia e lo bira un atleta riba e tereno di coremento y triatlon. Na momento cu Erick cu un peso di 123 kg a cuminsa haya hopi problema cu su rudia y y lomba, Erick a tuma e decicion di buska informacion riba e operacion serka dokter Ponson.
Despues di esaki mester a cuminsa un diet hopi estricto unda tambe a cuminsa cana pa asina por yuda na baha e peso na 100 kg y asina por haci e operacion. Un operacion cu a bai exitosamente. Despues di e operacion mester a sigui cu un periodo hopi estricto unda despues di 4 luna porfin Erick por a cuminsa cana atrobe. Sigur cu e intencion pa mantene su salud Erick a cuminsa core tambe y a bin join e team di coremento Aruba Malmok Runners. Aki Erick a haya un progreso hopi grandi unda a hasta cuminsa participa na caredanan na Aruba mes. Claro Erick no a laga e operacion bira un obstaculo pa por sigui bai dilanti den e deporte, y sigur a keda haci su controlnan y bebe su vitaminanan manera a wordo instrui door di dokter. Na 2017 Erick a haci su prome marathon na Aruba mes cu ta e KLM Aruba Marathon. Erick a demostra cu no tin limite pe y a bira un triatleta tambe unda a participa na varios careda di triathlon na Aruba. Den e periodo aki Erick tambe tabata bou guia di Sigfried Godoy kende tambe tin un experiencia amplio riba e tereno di coremento. Na final Erick a dicidi di join e team di Train Hard Race Easy unda e la sigui progresa. Erick a participa na 2018 na Las Vegas Rock ‘n’ Roll Half marathon y na 2020 na e Miami International Half Martathon.
Mirando e gran progreso cu Erick tabatin den un periodo di 5 aña, Erick a dicidi pa e aña aki, dia 5 di december cu ta su fecha natal, pa e bai haci un reto nobo. Cu e reto aki Erick kier yuda concientisa mas hende riba e operacion di Gastric Bypass y mustra kiko e beneficionan ta cu un persona por haya ora di haci e operacion aki.
Esaki lo bira un careda unda cu e lo ta coriendo di Lighthouse di Seroe Colorado pa California Lighthouse. E careda aki tin un averahe di mas o menos 40 km y lo bai haci esaki bou di 4ora.
Erick lo sali pa 3or di marduga y lo wordo acompaña pa mas coredo riba e ruta. Si tin coredornan cu tambe a haci e operacion aki y ta interesa pa join un parti di e ruta, cu nan por contact Erick na 5621817. Y asina yuda concientisa mas hende riba e operacion aki.
Erick sigur kier a gradici su sponsernan cu ta Get Energized Massage, Fruteria Virgilio, Ray’s, Axion, Sasaki Gasstation.
Tambe otro coredornan cu ta interesa por contact Erick pa mas informacion. Ta spera cu e dia aki lo ta un dia hopi grandi pa Erick Laurence y cu por yuda concientisa mas hende riba e operacion di Gastric Bypass.
