ORANJESTAD – Corte di Husticia den Promer Instancia a dicta sentencia den e caso penal cu Ministerio Publico a cuminsa contra e homber R.C.
Aruba Native por a compronde cu via video conference esaki a tuma lugar. Hues no a sigui Fiscal su exigencia di 8 aña di prison sino a baha esaki.
Luna pasa tratamento di e caso a tum a lugar caminda Fiscal a bisa cu R.C. mes a admiti cu riba un distancia di 3 meter el a tira riba suela den direccion di un grupo. A tira cu un shotgun fabrica yena cu balanan di metal. A haya algun di e balanan den curpa di e victima. Segun Fiscal, e motibo cu e victima ta bibo ta pasobra a herida tabata den banda y no den pecho.
Fiscal ta haya cu intencionalmente y cu rabia R.C. a tira riba W. cu e chens cu W. por a muri. W. a fractura un ripchi y afecta otro organo esta, pulmo y higra. Un di e otronan a haya un hagel den pecho y un otro den pia. Fiscal ta haya cu R.C. a tuma risico cu mas hende ta resulta herida y e chens di herida severo. Apesar cu no a haya e arma, por conclui cu R.C. tabatin un arma.
Fiscal a bisa cu e no ta kere cu por papia aki di defensa propio. R.C. tabatin e arma cune ora el a drenta den e bar y a mustra e arma na esnan den e bar. Ora di e problema, el a saca e arma y a tira. Pa loke ta demanda di daño, Fiscal ta haya esaki ta mucho halto y ta haya cu 15 mil florin lo ta na su lugar. El a pidi pa declara e resto no admisibel pa asina e victima lo por cuminsa un caso civil. Fiscal a exigi 8 aña di prison. Hues a bay studia e caso y a fiha sentencia despues di tres siman.
Hues a bisa cu e ta haya legalmente proba cu R.C. a purba mata hende door di tira cu e shotgun fabrica. Tambe Hues ta haya legalmente proba cu R.C. a purba causa heridanan severo na tres persona. Hues tambe ta haya R.C. culpable di tabatin un arma di candela. Hues a rechaza e defensa di mr. Illes cu R.C. a actua den defensa propio. Hues ta haya e caso hopi serio y a condena R.C. na 5 aña di prison, kitando e tempo cu e ta sera den KIA. Tambe Hues a aproba e demanda di daño manera Fiscal a exigi esta 15 mil florin y a pone e medida di pago.