Un palabra di elogio na KPA cu mester a controla, mester a cuida y babysit, esnan cu tabata ignorando e virus por completo, no ta paso e cantidad di contagio di Covid-19 a baha, por celebra y bay bek na prome cu Covid-19. Covid-19 tey y cu un descuido un persona por wordo infecta y asina sigui plam’e.
Oranjestad, Diasabra 31 di october den oranan di anochi, e celebracion di Halloween tabata grandi, nos casi no por a ni ripara cu tin un pandemia y cu ta afectando Aruba tambe.
Tur caminda tabata tin fiesta, party bus tabata core rond, gozando di Halloween, di otro banda polisnan tabata man yen cu asistencianan y controlandonan, pero tur cos tabata mustra cu un parti di e pueblo di Aruba no tabata respeta of na e momento ey no tabata conciente di e seriedad di COVID-19. Durante anochi tabata un chaos completo.
Halloween no ta un celebracion cultural di Aruba, pero asina mes a permiti e pueblo celebre y esaki sigur a bay for di man, cu varios detencion, polis a wordo agredi cu botter na altura di Linnearpark. Den area di High Rise hotel cos a bay asina for di man cu polis mester a cera un establecimento.
Mientras di otro banda na maart a para nos fiesta cultural, cual ta e celebracion di 18 maart, cu ta dia di Himno y bandera, tambe a stop e festival Un canto na Aruba su Himno y Bandera, mientras e tempo ey cu mucho menos hende contagia. Despues na Juni, e celebracion di San Juan, e festival di Dera Gai y tur e actividadnan riba 24 di Juni tabata wordo teni a keda cancela.
Ya caba tin pensa di cancela un otro festival cultural di Aruba, na December cu ta e Festival di Dande, e organizacion di e Festival di Dande, ta actuando den un forma hopi responsabel, nan ta prefera di cancela e festival pa motibo di e pandemia, pa asina evita aglomeracion y mas contagio.
E poco di Aruba su fiestanan, festivalnan of actividadnan cultural a keda cancela y mientras tanto ta permitiendo pa celebra Halloween, cu no ta parti di Aruba su cultura. Carnaval cu Aruba a haci’e un actividad cultural mas di grandi, tin rumornan cu otro aña e lo wordo cancela.
No ta conoci con ta midi locual Si ta permiti y locual No ta permiti, pero e aña aki, loke ta di nos a wordo cancela y net e celebracion cu no ta di Aruba a wordo permiti. Durante e fiestamento di Halloween hopi alcohol a wordo cunsumi y cu tur e consecuencianan cu e ta trece cu ne. Hopi hende tabata duna e impression cu nan no ta worry y no ta interesa cu tin un pandemia, esaki tabata refleha oor di nan actitud indifferente.
