ORANJESTAD – Sentencia a cay pa e sicario L.P.O. y e Arubiano M.T., den e caso di intento di asesinato. Aruba Native por a compronde cu via video conference e sicario L.P.O., sera na Bonaire y e Arubiano M.T. sera den KIA, caminda Hues a confirma e 10 aña di prison exigi pa M.T. y a baha e exigencia di Fiscal di 7 aña pa 6 aña di prison pa M.T.
Luna pasa tratamento di e caso a tuma lugar caminda Fiscal a mustra cu na e cas di M.T. a confisca 1 Kilo di cocaina, 3.5 Kilo di marihuana, algo mas di 500 pilder di XTC y 4 arma di candela. Fiscal a exigi pa destrui tur e armanan y droganan. Tambe pa destrui tur e materialnan cu a usa pa prepara droga pa bende. E placa cu a haya na e cas Fiscal a exigi pa esaki confisca.
Fiscal ta haya cu mester manda señal bon cla cu no ta accepta posecion di arma y mucho menos prepara asesinato.
Fiscal a mustra cu un Uzi (metrayador) ta un arma sumamente peligroso. E balanan hollow point tambe ta sumamente peligroso. Fiscal a exigi 10 aña di prison pa M.T.
Pa loke ta L.P.O., Fiscal no ta haya legalmente proba cu e tabatin armanan di candela hunto cun’e y pesey a pidi Hues pa declara L.P.O. liber di e acusacion ey. Fiscal ta haya legalmente proba cu L.P.O. ta envolvi den e preparacion pa mata e homber R.T. Ta L.P.O. ta esun cu lo mester a bay mata K.R. y mester a haya e armanan for di M.T. Fiscal a exigi 7 aña di prison pa L.P.O.
Diamars den oranan di atardi via video conference Hues a dicta sentencia pa tanto e sicario L.P.O. na Bonaire como M.T. den KIA. Hues ta haya legalmente proba cu tabatin un preparacion pa asesinato di e homber K.R. Hues a mustra cu no ta tolera delitonan asina na Aruba.
Pa cu M.T., Hues ta haya legalmente proba cu e tabata e persona di contacto y cu e tabatin un Uzi y tres ora arma na su cas, mas un cantidad di 500 pilder di XTC, 1 kilo di cocaina y 3.5 kilo di marihuana. Hues ta haya e castigo exigi pa Fiscal na su lugar y ta condena M.T. na 10 aña di prison. Hues a ordena pa destrui e droganan y saca e armanan for di circulacion.
Pa cu L.P.O., Hues ta haya legalmente proba cu el a wordo acerca pa mata un persona y cu el a accepta pa haci esaki. Hues a baha e castigo un poco pa L.P.O. y a conden’e na 6 aña di prison.