Djárason 14 di òktober 2020 alrededor di 01.36 or di mardugá, Sentral di Polis a dirigí un unidat polisial pa Kaminda Jose Papa Liberia, pa asistí otro unidatnan pa un aksidente di tráfiko grave ku a tuma lugá.
For di un investigashon preliminar ku polis a hasi, a resultá ku shofúr di un outo di famia, despues di a nota presensia di polis den e área, a kore riba un velosidat haltu ku lusnan pagá i bai for di e sitio.
Polis a pèrdè e vehíkulo aki for di bista i djis despues a bin topa e vehíkulo aki, ku a aksidentá kontra di un palu di lus.
Promé ku esei, un dama okupante di e vehíkulo aki a keda benta riba kaya na momentu ku e shofùr aki a kuminsá kore den skual ku su outo.
Shofùr di e vehíkulo, debí na e impakto fuerte kontra di e palu di lus a keda pegá i ku yudansa di personal di brantwer a saka e víktima for di e outo.
E shofùr aki a sufri múltiple leshon i a fayesé na e sitio, miéntras ku ambulans a transportá e dama heridá pa sala di emergensia di C.M.C., pa tratamentu médiko. Dòkter di polis ku a presentá na e sitio, a konstatá morto di e hòmber Reynaldo Roberto Ustasia nasé na Kòrsou, 12 di sèptèmber 1996.
Departamentu di tráfiko ta kontinuá ku e investigashon.
Nota pa redakshon – no pa publikashon
Pa mas informashon bo por tuma kontakto ku Departamento di Komunikashon i Prevenshon na e numbernan di telefòn 8666-150 / 8666-152 / 8666-153.
Orario: djaluna pa djabièrnè di 8.00 – 22.00 or;
- Por yama durante di dia i den wikènt pa hasi entrevista i despues di 22.00 or por tuma kontakto ku: • bosero suplente di Kuerpo Polisial Kòrsou Alto Inspektor Imro Zwerwer na number di telefòn 5242403.
SIRBI I PROTEHÁ
Departamentu di Komunikashon i Prevenshon Página 1