Ami -no- ta contra un supervision financiero. Al contrario. Hulanda tambe por ehempel a y ta transferi autoridad extenso na Union Europeo. “Let wel”; autoridad ta un poder specifico y limita, mientras cu autonomia ta un poder (casi) absoluto.
Hopi a wordo delibera y debati caba ariba e Rijkswet cu Politiek Den Haag kier impone na un manera inetico y inconstitucional ariba Aruba. Y awe Sr. Rocco Tjon a elabora (na radio) ariba e conseho huridico di entre otro e experto ariba tereno constitucional; Prof. mr. H.G. Hoogers di Rijksuniversiteit Groningen (RUG) kende lo entrega Parlamento di Aruba un conseho extensivo.
Importante pa menciona ta cu Prof. Hoogers / RUG ta wordo altamente considera na politiek Den Haag – kendenan tanto na aña 2008 y 2019 a contrata Prof. Hoogers pa compila entre otro e raportnan “Schurende rechtsordes / UPG of LGO status voor Aruba?” y Het Koninkrijk tegen het licht”.
Den su conseho recien Prof. Hoogers a conclui enfaticamente cu Hulanda ta mal-usando un crisis global pa impone interesnan y deseonan “CU Politiek Den Haag TIN PA HOPI AÑA CABA!”
Sinembargo Politiek Den Haag no a spera cu Gabinete Wever-Croes lo por a cumpli cu tur e normanan financiero y hasta surpasa e surplus project. Lamentablemente C-19 a bolbe duna Politiel Den Haag e -excusa- pa toch impone nan condicionnan draconico.
Akinan mi ta desea di para keto un rato y hasi e siguiente pregunta; porta asina cu e postura unilatetal aki di Politiek Den Haag ta motiva pa rabia? Corda; e siman aki (na ocasion di e 75 aniversario di e liberacion di Nederlands-Indie) diferente corantnan aki na Hulanda a enfatisa cu “de lang zittende minister van buitenlandse zaken Joseph Luns was EEN VAN DE MEEST PROMINENTE Soekarno-HATERS”. Soekarno ta por cierto e “founding father” di Indonesia…. mescos cu Betico Croes ta pa Aruba….
Den corto, si Politiek Den Haag ta motiva pa rabia, anto e ora ei prepara nos mes pasobra segun e ambtenaarnan aki na Den Haag; “e Arubiano -por- paga hopi mas na impuesto pasobra na Aruba mayoria di famia tin cas cu cura grandi, auto, etc.”
E pensamento eroneo aki di Politiek Den Haag ta simplemente 1 ehempel di e tantisimo friccionnan cu lo conduci na pobresa y no e promesa di progreso economico manera cu Politiek Den Haag ta purba bende nos.
Mi ta compronde cu e situacion financiero na Aruba ta dificil. Pero nos tin rosea ainda y nos no ta nos so mas den e impasse aki cu Politiek Den Haag. COPPPAL, EU, UN y otro organisacionnan internacional a cuminsa duna oido na e acto aki, “COLONIALISM AVANT-LA-LETTRE”, di Politiek Den Haag.
E Arubiano semper a mira su mes como e architecto di su futuro. Ami si ta convenci cu si nos para firme pa nos derechonan nos lo progresa den nos negociacionnan y yega na un sinergia cu Politiek Den Haag.