Gobierno di Aruba dialuna mainta a ricibi un ‘update’ di e derame (oil spill) cu a surgi siman pasa na Tucacas. Mirando cu e noticia aki ta circulando via medianan social y treciendo cierto incertidumbre, sr. Rino Hermans Rampen Bureau a duna di conoce cu e derame aki no ta un menasa directo pa Aruba ni su costanan.
Rampen Bureau constantemente ta monitoriando e derame aki desde principio. Aruba a tuma contacto cu varios luga na Venezuela sin ningun resultado. Por ultimo a pidi Caracas pa haci un investigacion mirando cu nan ta cerca. A constata un derame na El Palito na Venezuela cu ta destruyendo e ecologia maritimo.
Segun e expertonan di Venezuela y esnan cu a haci e investigacion, no ta mira e peliger pa cu e islanan ABC. E bron caminda cu e derame aki a cuminsa a keda conteni. Rampen Bureau lo sigui monitoria e situacion pa cu esaki. Alabes a tuma contacto cu kustwacht pa nan por tira un bista durante cu nan ta patruya, pero te cu awor kustwacht no a constata nada. Kustwacht lo sigui monitor e situacion y cualkier cos abnormal cu nan constata lo notifica Rampen Bureau di inmediato.