Ex Prome Minister Mike Eman y esposa Doina hopi gradicido pa sosten, y ta expresa solidaridad y afecto pa esnan cu Covid-19
Riba su red social Ex Prome Minister Mike Eman a expresa su gratitud pa tur e sosten cu su esposa Doina y e ta ricibi durante e periodo dificil cu nan ta pasa aden y na e mes momento a mustra nan afecto y solidaridad cu tur esnan afecta pa Covid y tambe sosten na nan famia.
Mike y Doina ta haci yamada tambe riba comunidad pa corda bisti nan mask y dunando e estimulo aki nan mes. Eman a duna tambe un relato di e siguiente pasonan den tratamento di Doina.
Riba su red social Ex Prome Minister Mike Eman a pone literalmente:
Friends, amigonan, un diadomingo Bendiciona. Ricibi for di profundo di nos curason nos miho deseonan y convivencia cu henter nos comunidad na e momentonan dificil aki cu nos isla stima y pueblo ta pasando aden. Nos ta resa pa tur cu ta afecta pa nan sanacion y forsa pa nan famia. Nos ta convivi cu profundo gratitud pa tur amor y sosten cu nos a ricibi desde Doina su operacion y e tempo pisa y dificil di kimo.
Danki na boso oracion nos bon Dios a pone Doina riba un bon caminda faltando algun test adicional pa nos ta sigur. Pa esey nan mester manda nos Hulanda e siman aki pa Erasmus Medisch Centrum. E situacion preocupante cu e brote nobo y grandi di virus na Hulanda y na Aruba ta haci cu un biahe bao di e circunstancianan actual ta trece hopi riesgo pa Doina su salud delicado. A conseha nos pa no tuma e riesgo aki y pa awo sigui monitoria Doina su salud na Aruba.
Laga nos tur rumannan tene fe cu nos hunto lo surpasa e momentonan dificil aki. Cuida Boso mes y Boso famia y nos comunidad. Tuma tur precaucion. Bisti boso mask ora di bay pafo y ban cuida otro cu empatia, amor y stimacion. Danki pa boso amistad, nos t’ey cu bosonan. Un caluroso abraso. [Mike y Doina]