For di aña 2001 Aruba a percura pa cumpli na Verdrag di Derecho di Mucha y bin ta cambia hopi leynan na bienestar di nos muchanan. Na 2004 Bureau Sostenemi a wordo lanta pasobra comunidad tawata kier aun mas mehoracion den e cadena di ayudo pa nos muchanan y nan proteccion. E tempo ey a implementa e proyecto, Stop Awor! cu a trece hopi reaccion positivo den comunidad. Na 2010 Parlamento a lanta un ‘bijzonder commissie’ pa sigui atende e tematica y a ricibi diferente puntonan di mehoracion cu tin di traha riba nan. Na 2013 rapportnan oficial di entre otro polis y otro instancianan ta constata cu cifranan di ‘zedendelicten’ ariba menor di edad a sigui subi.
Manifestacion
Na 2016 a bini diferente manifestacion ariba e tema di abuso di mucha, pasobra pueblo kier a mira mas cambio. Basa ariba art III.23 di Staatsregeling, Parlamento a lanta dos comision fiho pa atende e topico di abuso di mucha. E tempo aki a yega na conclusion lastimoso cu e puntonan di 2016 tawata similar na esnan di 2010, cu e ‘bijzondere commissie’ e tempo ey no a continua cu nan manera desea.
Nos tin di menciona cu e manifestacionan di mei 2016 hiba pa Fundacion sra. Lisette Gomez, y di April 2016 di sr. Danies a causa e spiertamento cu nos comunidad tawata tin mester pa sigui traha ariba e tema di abuso di mucha.
Tampoco no por lubida cu na 2017, Aruba a conoce e dobbel morto di e muchanan inocente cu a marca un realidad tristo den historia di nos Pais.
Awe Aruba ta para dilanti di otro manifestacion, cu na mi opinion ta necesario y na su lugar. Sinembargo nos kier reconoce e esfuerso di esnan den diferente departamentonan den e ultimo añanan cu a pasa.
Crisis Plan
Desde inicio di Social Crisis Plan na 2017, Aruba a haya un inyeccion di 37 miyon florin cu Parlamento a pone na disposicion di 31 instancia social, unda cu e enfoke primordial ta, pa bringa contra abuso di mucha cu a bira un tragedia pa hopi cuidadano di nos Pais. Awe nos tin e centro pa Hoben y Famia cu ta enteramente dedica na fortalese famia, mucha y hoben. E ta enfoca ariba desaroya tecnicanan con pa bo ta un mihor mayor pa bo yiunan. Tambe na Playa (banda di Wendy’s) lo habri Family Justice Center unda lo ricibi famia, mucha y hoben cu ta victima di abuso, violencia y otro tipo di problemanan, pa brindanan apoyo y ayudo. Aki lo tin un medico forensico cu lo hasi investigacion a consecuencia di abuso, violencia y trauma pa esaki por wordo substancia y por wordo presenta dilanti huez, contrario na awor cu casonan no ta wordo bon presenta dilanti mesa berde, cu ta termina den castigo no apropia.
Den e mes edificio lo bini un camber di interogacion pa Jeugd en Zeden Politie, y lo tin mas espacio pa otro instancianan tambe manera Bureau Sostenemi, Voogdijraad, DAS, OM, Fundacion Guiami, pa hunto traha ariba e mesun problematica, bou di un solo dak. No por lubida ariba Collaborative Partnerships cu ta na 6 di nos scolnan, unda famianan vulnerabel ta asisti pa ayudo. E proyecto di Tienermoederproject na Casa Cuna, unda ta asisti mama teenager den cria su yiu den un forma responsabel y dun’e e apoyo cu e mester.
Conclusion
Nos tin di atende cu e plaga di abuso aki di diferente angulo, cuminsando prome na fortifica e fundeshi di e famia y terminando na castigonan apropia na esnan cu ta abusa di muchanan. Maske cu tin basta cambio y proyectonan andando y ya caba hopi famia ta wordo yuda, nos tin di keda presiona pa mucho mas. Pesey mi a presenta un mocion pa percura cu lo tin fondo duradero pa tur e proyectonan aki despues di evaluacion. Y tambe mi a presenta dos concepto di amienda, cu lo wordo poni den un otro ley cu lo yega Parlamento dentro di dos luna, na bienestar di proteccion pa nos muchanan. Den mi siguiente articulo mi lo sigui amplia ariba e Codigo di Proteccion Infantil y Hubenil, y mas leynan cu falta. Pero laga nos pone bon cla, nos no kier pa mira mas abuso tuma lugar, Tevreden a termina bisando.