Oranjestad – Diaranson den orannan trempan di mainta un team grandi consistiendo di Ministerio Publico, Landsrecherche, RST y Interpol a cuminsa cu Entradanan Hudicial. Varios cas y negoshinan a wordo bishita.
Entre otro e casnan di ex Minister Otmar Oduber, tambe casnan di algun commerciante conoci.
Un di e entradanan hudicial a tuma luga na e negoshi Fast Delivery Services, di cual e propietario ta Sr. Richard “Gigi” Helder. Na e sitio tambe por a mira tur e trahadornan para pafo. Tur trabou a wordo paralisa. Por a mira te hasta segun nos a compronde personal di Interpol na e negoshi aki.
Segun informacion no oficial Autoridad a drenta tur e negoshinan di Gigi Helder. Sr. Helder ta hiba e maneho di General Aviation Terminal caminda cu tambe autoridad a drenta pa haci mas investigacion.
Ta wordo papia cu lo ta trata di un investigacion caso grandi andando referente otorgamento di tereno y hopi mas cos.
Segun nos a compronde autoridad a pidi ex Minister Oduber pa compañanan, no ta conoci si detencion a cay y mucho menos di cuanto persona. E caso aki ta trata di entre otro di Gigi Helder y muy probablemente un of mas hende yega na ex Minister Otmar Oduber. For di cas di ex Minister Oduber, autoridad lo a bay cu te hasta un container cu tabata staciona dilanti di e cas pa mas investigacion.
Segun nos a compronde Abogado Mr. Chris Lejuez lo ta e abogado di Sr. Otmar Oduber den e caso aki.
Nos ta en espera di un relato oficial di Ministerio Publico.
