Den e historia di trafico di Aruba, den e añanan 70 pa 80 tabata tin temporadanan den cual tabata pasa hopi accidentenan fatal y mayoria biaha hobennan tabata perde nan bida. E temporada aki a trece hopi tristeza pa varios famia na Aruba. Accidentenan cu tabata impacta y conmove henter nos isla.
Den e añanan 70 pa 80, trafico na Aruba tabata hopi insigur, hopi bida a wordo cobra den accidentenan pa motibo di velocidad halto y di uso di excesso di alcohol. E camindanan e tempo ey no tabata construi pa core cu velocidad halto.
E biaha aki nos lo dedica historia di Aruba na un siman pisa y scur pa nos isla, e siman di 25 di juni pa 30 di Juni 1978, den menos cu un siman Aruba a conoce 3 accidente fatal den cual 5 persona a perde nan bida, tabata trata di 4 hoben y un señora di 45 aña.
Tur cos a cuminsa dia 25 di juni 1978, un diadomingo atardi, na momento cu un señora di fam Maduro cu su yiu muher di 8 aña a bay hunto den auto pa cumpra pan. Nan a sali for di un caminda di santo na Rooi Bosal y a subi e caminda principal net na e momento cu tabata biniendo un auto cu velocidad halto for di pazuid. E auto no por a controla su velocidad na tempo y a dal hopi duro contra e auto di Señora Maduro. E impacto fuerte a pone cu e auto di Maduro a bay pega riba un sero. E yiu muhe di e señora a wordo saca for di e auto y a keda gravemente herida, e la wordo transporta cu hopi urgencia pa hospital. Lamentabelmente e impacto tabata demasiado fuerte cu señora Maduro a fayece na e sitio.
Rooi Bosal
E di dos tabata un accidente hopi cruel cu a impacta henter e pueblo di Aruba y ainda esnan cu ta biba den cercania di e rotonde di Tanki Leendert sa papia di e accidente aki. Tabata dia 26 di juni 1978, un dialuna den careda di 1’or y 45 di marduga tres hoben, Franken di 21 aña, Tromp di 22 aña y un amigo tabata hunto den un auto, yegando e crusada di Tanki Leendert,(actualmente e rotonde Tanki Leendert) un otro auto maneha pa un hoben di fam Ramada di 21 aña tabata biniendo cu velocidad hopi halto y no a duna nan preferencia. e la dal frontal contra e auto cu Franken y Tromp tabata den. E impacto tabata asina fuerte cu un di e autonan a bay cay riba e otro auto cu resultado fatal pa tres di e hobennan aki.
Crusada Tanki Leendert (actualmente Rotonde Tanki Leendert)
E impacto tabata hopi fuerte y e zonido por a wordo scucha for di hopi leu. Mesora hopi hende a core yega cerca pa mira con nan lo por yuda, mientras a yama polis y ambulance cu hopi urgencia.
Un di e autonan cu tabata envolvi den e accidente na Tanki Leendert
E accidente aki a causa un impacto riba hopi hende. E hobennan den flor di nan hubentud a wordo ranca for di e mundo aki, nan a laga un bashi y un dolor grandi pa nan famia y nan amigonan. Sigur nan tabata tin como hoben hopi plan pa futuro, tur a caba den un impacto cruel y tristo. E crusada di Tanki Leendert aki a cobra hopi bida prome cu e la wordo cambia den un rotonde.
E siguiente tabata riba diahuebs anochi pa diabierna mainta. Diabierna mainta un auto cu hopi daño material a wordo haya den e mondi banda di e caminda di Barcadera. Tur cos tabata mustra cu e auto a accidenta, debi na e daño material visibel y tambe tur e manchanan di sanger cu tabata tin na e auto. Pero no a bin topa cu niun hende cerca di e auto.
E v-car den cual e hoben Marinier a perde su bida na Barcadera
Polis a cuminsa cu un investigacion y nan a bin compronde cu e auto ta pertenece na un compania di huur. E compania a informa autoridad cu nan a huur e auto aki cu un marinier derde klasse di 20 aña di Savaneta Kemp. E marinier tabata yama Charles van der Pal.
Na e momento ey niun hende no tabata sa unda e marinier aki tabata ta. Polis a check na Marinierskazerne y tambe a check cu hospital, mirando e daño considerabel cu tabata tin na e auto, pero ambos luga tabata sin resultado.
Autoridad a dicidi di pone un grupo special di polis pa cuminsa cu un buskeda grandi den e mondi di Barcadera. Tabata te den careda di 1’or y mey di merdia cu nan a bin topa cu un curpa sin bida, e curpa tabata di e Marinier Charles van der Pal.
Di Juni 25 pa Juni 30, 1978, den menos cu un siman 5 persona a perde nan bida den accidentenan fatal. Na 1978 den 6 luna di tempo, e trafico insigur a cobra 17 bida, den cual mayoria tabata hobennan.
Source: anonimo, Amigoe