Tanki Leendert: Diadomingo un poco despues di 8’or di anochi, patruya di Noord y tambe di trafico a wordo pidi cu urgencia na Tanki Leendert na altura di e Speelschool “Mi preti Wowo” pa un auto cu a bay draai y a dal contra un cura di cas.
Na yegada nan a bin topa cu un Nissan Sentra Blanco pega contra un cura di cas. Mesora nan a bay atende cu e chauffeur di e auto. Polis a nota cu e homber tabata bou influencia di un of otro substancia. E tabata keda move y no tabata tin paracion.
Polis a detene e chauffeur y e la wordo transporta cu transportwagen di polis pa Warda di Shaba.
Na momento cu polis tabata atendiendo cu e boksmento aki, un familiar di e homber a yega na e sitio y e la conta polis, cu ta varios biaha caba cu e homber aki ta riba su cosnan. Polis a splik’e camindanan cu e meste cana.
Net na e momento ey e pareha of ex pareha di e chauffeur tambe a yega na e sitio , e dama aki a splica polis cu for di basta dia caba e tin problema cu e homber y cu te hasta e lo a core e homber for di su cas, pero e homber no kier tende y awe e la sali bay draai cu su Nissan Sentra, caminda e la perde control bay dal contra e cura di cas.
Polis di Trafico tabata na e sitio y a tuma datos di e boksmento aki. E auto a keda confisca y cu takelwagen e la wordo transporta pa warda di Balashi.
