Oranjestad, 7 di mei, 2020—Manera ta custumber, cada dos (2) aña, Aruba Bankers Association (ABA) ) ta elegi un directiva nobo y despues ta apunta e Presidente pa e termino cu ta cuminsa na 2020 te cu 2022.
Durante di e reunion general cu a tuma lugar 30 di april, 2020, Sharon Fränkel-de Cuba, Managing Director di Aruba Bank N.V, a wordo apunta Presidente di Aruba Bankers’ Association pa e proximo dos (2) añanan. Javier Wolter, General Managing Director di Caribbean Mercantile Bank N.V. a wordo apunta Vice Presidente di e associacion, y Giovanni Atencio, Country Head di CIBC First Caribbean, a wordo selecciona como Tesorero di e associacion.
E meta principal di e Aruba Bankers Association ta pa representa e interes di e banconan, contribuyendo na un desaroyo sano di e sector bancario y e economia di Aruba en general.
Durante di e temporada dificil di crisis actual, ABA ta compromete su mes pa sigui traha na bienestar di nos comunidad y pa ta prepara pa duna conseho na instancianan gubernamental y no-gubernamental.
Specificamente pa sigui contribui na desaroyo di un economia sano, ABA lo sigui aporta pa nos comunidad ta bon informa ariba desaroyonan economico y financiero cu ta afecta nos comunidad.
Aruba Bankers Association ta gradici Elvin Maduro, Managing Director di Banco di Caribe, pa su contribucion durante di e ultimo dos (2) añanan.
