Home » FPNA ta introduci maneho pa regula Vehiculo di Motor

FPNA ta introduci maneho pa regula Vehiculo di Motor

by Admin
0 comment 75 views

Santa Cruz, Aruba – Fundacion Parke Nacional Aruba (FPNA) su mision ta pa conserva Aruba su herencia natural y cultural pa futuro generacion, inspirando e comunidad local y e bishitantenan pa haci mescos. FPNA su maneho existente tabata permiti recreacion iregula di masa motorisa den nos areanan protegi. Continuacion di e maneho aki ta stroba FPNA den su capacidad pa conserva e areanan natural bou di su cuido efectivamente.

Consistente cu e rol di FPNA como autoridad independiente den e materia di conservacion y sostenibilidad di naturalesa y como portavoz di e consenshi colectivo di naturalesa di Aruba; cu tin e derecho legal di introduci maneho pa salvaguardia nos metanan di conservacion di naturalesa y di acuerdo cu nos deber di protega y conseva naturalesa, nos lo expone e maneho aki pa regula e recreacion motorisa di masa na mes momento cu nos ta permiti un enfoke mas sostenibel di recreacion.

Ehecucion di e maneho nobo di FPNA encuanto regulacion di trafico di motor den areanan bou di su maneho lo tuma lugar den tres fase. E prome fase, cual ta drenta na vigor entrante 1 di juni 2020, lo ensera un prohibicion di tur vehiculo di motor cu excepcion di SUV, Pick-Up, Van, y Auto Compacto individual y como parti di un tour bou guia. Utility Terrain Vehicle (UTV) ta permiti temporalmente (cu ta termina 31 di december 2020) den e areanan protegi como parti di un bishita bou guia registra cu FPNA. All Terrain Vehicle (ATV), motocilceta, buggie, trike y otro tipo di vehiculo di impacto halto ta estrictamente prohibi den tur area di naturalesa protegi bou maneho di FNPA.

Ademas den e prome fase lo introduci regulacion ariba tamaño di tour y frequencia di bishita. Adicionalmente ta encera tambe un paro completo pa applicacion/registracion pa e tour operators cu vehiculo di motor y mihor regulacion di tour operators actualmente registra cu nos Fundacion.

E proximo fasenan di e maneho ta diseña pa sigi regula trafico no desea den areanan maneha pa FPNA pero tambe pa stimula recreacion sostenibel por medio di “Low Impact Activities”. Pa mas informacion a percura pa e maneho aki ta disponibel riba nos website: www.arubanationalpark.org.

FPNA ta premira cu e introduccion di e maneho aki, lo frena e actividadnan recreativo dañoso pa naturalesa y lo encurasha recreacion sostenibel den areanan maneha pa FPNA. Por ultimo, FPNA lo periodicamente evalua e maneho aki y lo adapta esaki na momento cu medidanan adicional ta na beneficio di conservacion di naturalesa y e seguridad di bishitantenan.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio