Guanare, Venezuela – Diabierna pasa un motin den e prison ‘Centro Penitenciario de Los Llanos’ (CEPELLA) a laga atras 46 morto y 70 heridos. Esaki ta cifranan cu directora di Amnesty International (Americas), Erika Guevara-Rosas, a duna di conoce.
Aki e rebeldia a resulta den morto tambe di e director di e prison. Problema a surgi despues cu prisoneronan a bay varios dia caba sin come. Pa motibo di e pandemia di coronavirus no tawata permiti familiar di esnan prisonero entrega comestibel (o medicamento) pa nan.
E situacion a causa un escalacion cual a resulta den violencia y caos total. Ta ser bisa cu ta e forma cu miembronan militar a responde cual a causa e masacre aki. E sistema di prison na Venezuela ta bou inmenso presion. E prison CEPELLA a wordo construi pa tene un maximo di 750 prisonero. Actualmente e tin alrededor di 2500 prisonero.
Erika Guevara-Rosas di Amnesty International a splica cu : “Esaki no ta prome biaha cu nos ta mira prisoneronan na Venezuela sufri violacion teribel na nan derecho di bida. E imagenan cu awor ta ser publica rond mundo mester sirbi como recordatorio cu tur esnan responsabel pa e atrocidad aki mester wordo treci dilanti husticia. E forma letal cu autoridad a responde mester wordo profundamente investiga y analisa pa asina e crimen internacional aki no bay sin castigo.”
Agentenan di e Guardia Nacional Bolivariana (GNB), cual ta bou comanda di Presidente Nicolás Maduro, a purba hustifica nan uzo di violencia extremo y letal paso aparentemente e prisoneronan a intenta di escapa e prison. Un agente so di e GNB a fayece den e motin.
