World Health Organization (WHO) a informa diahuebs cu mitar di tur e casonan mortal di coronavirus na Europa a sosode den cas di anciano. Dr. Hans Kluge, WHO su director di e seccion di Europa a splica cu e ta sumamente preocupa pa cu e hecho aki.
E data a mustra cu e impacto cu coronavirus tin riba casnan di anciano ta devastador. Segun Europa su centro pa prevencion y control di malesa, mas cu 110,000 Europeo a fayece a causa di COVID-19.
Dr. Kluge a nota si cu e casnan di anciano aki tawata facilidadnan conoci pa ta negligente, esaki paso empleadonan ta traha oranan hopi largo y ta mal paga tambe. E a continua na splica si cu empleadonan di casnan di anciano ta e heroenan desconoci den e crisis aki.
WHO a indica cu e crisis a cuminsa stabilisa den algun region, pero cu e bataya contra e virus ta leu di caba. Mas cu 1.1 miyon caso registra di Europeo infecta cu e virus. Spaña, Italia y Alemania ta algun di e paisnan mas afecta.