Mundo henter ta den momentonan di crisis. Apesar di diferencia di opinion con pa “handle” e crisis, toch nos ta ripara e necesidad pa pensa riba interes di e pais como tambe di e personanan cu a bira victima di e virus.
Loke ta sosodiendo den e coalicion y gobernacion actual ta hopi peculiar. Den caso di diferencia di opinion mes, esaki por lo general lo ta cu e partidonan opositor, pero no cu partidonan cu ta conforma un coalicion. Aki na Aruba nos tin atrobe un PRIMICIA, na unda pa saca probecho personal e lider di un partido cu ta sostene e gobierno a prefera di cumpli cu interes propio y partidista. Populismo den optima forma!!
Un acto premedita y bon prepara, cu for di un algun tempo caba nos a wordo informa cu ex-minister aki, tabata tin reunionnan cu diferente representante di gremionan sindical y comercial na Aruba. Tambe el a bay asina leu di usa e Minister Plenipotenciario (POR) na Merca, hunto cu su “hendenan” den ATA, pa papia cu e “stakeholders” importante riba tereno di turismo. Pero aki no tabata pa e bienestar di nos Isla y su hendenan, pero simplemente e ta wak un oportunidad pa sigui previlegia su compichinan y tur esaki riba custiya di su ex-coleganan cu “cueste lo que cueste” a defende. Ainda nos por corda con Ministro Presidente den Parlamento recientemente a indica cu ta riba su peticion a nombra e ex-minister den e Raad van Commissarissen di RDA. Hustamente e persona cu a trata di tur forma pa cera y desmantela e refineria pa asina por cobra e “findersfee” si e logra construi un hotel na Sero Colorado.
Y manera ta custumber di e Scorpion, el a dicidi di hinca puñal cu sucu y tur den lomba di e gobierno. E acto aki ta un simpelmente un MOCION di DESCONFIANsA directo contra e gobierno POREDmep. Ta parce cu e lider di e partido POR no tin confiansa den e forma con gobierno ta atende y maneha e situacion di crisis y “achter de gordijnen” a dicidi di pone un “tijdbom” bou di e gobierno aki. Durante di presentacion di e plan di accion el a trata na “sugarcoat” su intencion, pero e ta keda un insulto directo y un atake contra e credibilidad di e gabinete aki.
Loke ta mas macabro di e plan cu el a presenta, ta e bendemento atrobe di patrimonio di nos pueblo. E kier bende parti di accionnan di WEB, ELMAR y SETAR, y pa trata na adelanta cualkier critica, a considera pa bende esaki na identidadnan local manera APFA. Pero awor aki mes APFA ta hinca den su stoma cu e inversion hinca den un hotel na Aruba y cu pa e tempo cu ta bin lo no bay ricibi ningun tipo di ganashi, ya cu esaki ta cera, dor di e mesun Covid-19. Y otro inversion cu APFA ta hinca cu ne, ta esun di hospital Horacio Oduber. Un proyecto yena cu corupcion y cu no tin fin di caba. APFA lo bay encontra problema cu pagamento di huur dor di HOH na SOGA, ora cu AZV bay tuma e medidanan necesario pa falta di entrada. Y aki Apfa a hinca hopi placa. Placa di esnan cu ta contribui den e fondo aki.
Claramente ta trata aki di un plan macabro y diabolico ala su “MASTER”, Tico Croes, ex-minister y ex-lider di AVP. E tambe tabata tin e genial idea pa bende patrimonionan di pueblo y te hasta bende santana. Sin lubida e asina yama “TICOMATICS”, cu e actual minister di Economia y Finanzas a yama “TICOTRONICS”!!
Danki Dios cu Minister Presidente a kita e discusion ey for di mesa, y nos ta apoya su persona pa esaki! Sinembargo esey no ta kita afo cu e documento aki, cu ta carga aprobacion di e partido POR, a demonstra atrobe cu nan ta “op een populistische toer” y cu nan ta preparando pa un posibel caymento di gobierno. Pesey nos ta considera e plan di e ex-minister aki como un “mocion di desconfianza”, un “brevet van onvermogen” den direccion di e gobernacion actual.
Y ainda nos ta sigur cu tin mas veneno den loke ta plan presenta aki. Y manera nos ta bisa cu awor aki no ta tempo pa hunga populista. Of nos por tin sorpresa na caminda?