Oranjestad – Diahuebs den oranan di merdia automobilistanan pasando dilanti Warda di Polis na Playa por a mira varios agente policial para pafo.
E diferencia e biaha aki tawata, cu nan tawata na Burger ,o sea Civil bisti.
Locual nos a compronde ta cu lo ta trata di un diferencia di opinion entre Polisnan uniforma (Straat Dienst) cu e mando Policial actual.
E diferencia lo ta sinta cu Mando Policial kier pa agentenan bisti nan uniform normal y no esun full blauw scur.
Polisnan uniforma na nan turno, no ta di haci esey debi cu e uniform tradicional tin hopi metal ariba dje. Y segun tur e informacionan, e virus COVID-19 ta keda ariba metal. Cu e metal nan kiermen e streepnan ariba schouder, name tag y fluit.
Pero mando no kier tende nada y a bisa cu mester bisti uniform normal o sea e blanco.
Hopi di esnan den e reunionan aki di ‘leiding’ manera e ta wordo yama, ta di hendenan cu masha poco ta subi caya.
Pues segun Polisnan uniforma, nan no sa kico lo ta come y bebe ariba caya compara cu esnan cu ta haciendo e trabou aki diariamente.
Tambe nos tin entendi cu lo tin dos Polis di rango halto den cuarentena, esaki tawata un tema cu a wordo bisa s durante e reunion. A sigui bisa tambe cu si un polis tin sospecho cu ela wordo infecta, e lo mester haci test mesora y bay den isolacion.
Tambe Leiding a pidi pa agentenan mes haci e wardanan limpi, cu tampoco a cay den bon tera.
Algun dia atras Mando/Leiding a tuma e desicion di no atende cu publico, pero awor a cambia atrobe y cu e porta dilanti mester keda accesibel pa publico cu tur consecuencia cu esaki tin cune.
Pa e motibo aki Warda di Playa tawata esun prome cu a mustra nan disgusto diahuebs merdia.
No ta conoci kico lo bira e siguiente pasonan y/of si otro Wardanan di Polis lo bay haci mescos.
