Universidad Johns Hopkins a confirma cu tin mas cu 1 miyon caso registra di COVID-19. Casi 53,000 persona a fayece di e virus y 210,000 persona a recupera.
Aruba
13 di maart Aruba a conoce su prome 2 casonan di infeccion. Gobierno a tuma medidanan bastante rapido pa purba preveni cu e casonan lo sigui crece. Na momento di e publicacion aki Aruba tin un total di 60 caso registra di e virus. Informacion ricibi 31 di maart a indica cu tin 4 persona interna den hospital, di cual 1 ta den ICU, 1 den medium care y 2 ta isola.
Den e grafiek abou di informacion compila pa Sr. Edward Cheung, por mira e crecemento den e casonan registra di e virus hunto cu e medidanan introduci. E ta duna indicacion cu e medidanan tuma pa Gobierno lo a tuma dos siman pa mustra efecto riba e rate di crecemento.
Internacional
COVID-19 ta un virus relativamente nobo. Esaki a surgi aparentemente 3 luna pasa na China. Aunke cu Johns Hopkins a conta 1 miyon caso, mester tene na cuenta cu e cifra aki en realidad ta hopi mas halto. Aki ta papiando solamente di e casonan registra.
E virus ta crece rapidamente, den e prome Luna y mey a registra 100,000 caso di infeccion. Den e delaster siman e cifranan a dobbel, yegando awo mas cu 1 miyon caso di infeccion.
Un kwart di e casonan aki ta registra na Estados Unidos. Mientras cu mitar di e casonan aki ta registra na paisnan Europeo. Globalmente e pandemia aki tin un efecto desastroso riba economia y empleo.
Estados Unidos a haye cu 6.6 miyon di Americano cu a registra pa ricibi beneficionan di desempleo. Den 24 ora 1169 persona a fayece, esaki ta un cifra di mas morto den un dia, esaki tawata un record mas halto cu tur otro pais na mundo.
Prome cu esey na Spaña e record tawata 950 morto den 1 dia. Na Spaña e casonan ta mustra di tin un crecemento di 8%, e a bay di 102,136 pa 110,238 caso. Autoridnan ta pensando cu e cifra aki lo yega su ‘peak’ y lo cuminsa baha den e dianan dilanti.
