Expertonan y activistanan ta alerta cu casonan di violencia domestico por aumenta den e temporada aki. E pandemia di Coronavirus y tur e medidanan cu a bin hunto cune ta pone hopi presion riba hogarnan.
Famianan cu no tin historia di violencia domestico mes por sinti e stress di locual ta e pandemia aki. E preocupacion ta bin momento cu victimanan ta haya nan mes sera den cas cu nan abusador.
Esnan cu ta comete violencia fisico o emocional ta conoci caba pa intenta di isola nan victima for di nan amistadnan o familiarnan. E situacion actual ta hacie facil pa un abusador impone mas restriccion den cas (p.e. prohibi nan victima di bay scol o trabou)
World Health Organization (WHO) ta informa cu 1 den cada 3 hende muher na mundo ta experiencia abuso fisico y/o sexual. Esaki ta sosode mas tanto na man di un pareha intimo. E casonan aki ta hopi comun y esunan menos raporta na mundo.
Den investigacion haci pa WHO violencia di genero ta aumenta durante crisis humanitario y conflicto (p.e. guerra). E pais mas afecta te ainda pa e coronavirus ta China. Agentenan policial di e pais a mira casonan di abuso y violencia domestico triplifica den e periodo aki.
Un investigacion haci pa un organisacion Chines anti-violencia domestico yama, Wan Fei, a descubri cu 90% di e casonan di violencia tawata relaciona cu e epidemia di coronavirus.
Informacion for di e linea Mericano di emergencia di violencia domestico ta informa cu abusadornan ta intimida nan victimanan. Nan ta menasa di saca nan for di cas, pues lagando nan riba caya pa asina nan bira malo. Tin abusador ta menasa di nenga di duna nan victima ayudo financiero o medico.
Cu tur e atencion bayendo pa preveni mas caso di e virus y pa combati esaki, casonan di violencia domestico por keda sin wordo raporta o no tuma cu e seriedad necesario.
Esnan mas vulnerabel pa abuso manera nos muchanan o hende muhernan mester wordo protehi.
Si abo o un persona serca di bo ta experienciando e tipo di violencia aki por fabor busca ayudo. Por yama Fundacion pa Hende Muhe den Dificultad na 583 5400 o polis na 911.