Nota editorial: Aruba Native ta encarga su mes pa duna cobertura esencial di e lucha contra Coronavirus. Esaki ta nos responsabilidad periodistico pa asina mantene e pueblo di Aruba debidamente informa y educa riba con pa atende cu e crisis actual. Aruba Native ta basa su publicacionan riba informacion ricibi for di fuentenan oficial. Nos ta suplica nos lesadornan pa sigui recomendacionan for di fuentenan oficial, esnan local (p.e. DVG, Hospital…) y internacional (p.e. WHO, CDC..).
Aruba conoce un caso mas di Coronavirus. Den conferencia di prensa Minister President Evelyn Wever – Croes a duna di conoce cu awe a bin un caso adicional di e virus.
Tin actualmente un total di 9 persona infecta cu COVID-19. E caso adicional di Coronavirus ta un transmision local, pues un persona cu a keda contagia na Aruba mes.
No ta conoci si e persona aki a bin den contacto cu un di e otro 8 persona ya infecta. Tampoco a duna di conoce si e persona aki tawata den cuarentena prome cu e a sali positivo pa e virus.