Parlamentario Jennifer Arends-Reyes: Presupuesto 2020 mester ta inaceptabel pa Parlamento cu un surplus di 46 miyon ta contradictorio na e realidad y necesidad di Aruba

Oranjestad: segun Sra Arends-Reyes nos ta bibando momentonan sumamente preocupante pa cu e situacion mundial tocante e efectonan desastroso causa dor di e virus di COVID-19. Nos ta wak con paisnan sercano y cu relacion cu Aruba ta bayendo den un situacion di calamidad caminda tur cos ta sera, scolnan, tiendanan, misa, tin paro di biahe y con personanan ta keda infecta na gran escala. Mientras cu gobierno di Aruba a caba di cualifica e situacion como un crisis cu ta afecta Aruba, su pilar economico y tambe riesgo pa e salud di su poblacion, e presupuesto cu gobierno di Mep-Por-Red a presenta na Parlamento y ta forsando pa pasa den e dianan venidero no ta cuadra cu e realidad y necesidad di e pueblo di Aruba. Con por ta posibel cu nos ta den diferente crisis y un di nan ta con nos lo maneha e efecto di un pandemia riba un isla turistico dor di manca y corta 1/3 parti di nos presupuesto di mercadeo pa maneha y atrae turista pa Aruba? Gobierno di Aruba ta exihiendo 35 miyon florin awo, mey mey di un crisis, emergencia mundial pa realisa bunita cifra pa tene Hulanda contento y scapa un KB. Corda cu Gobierno di Mep-Por-Red a pidi y haña tur sorto di plaso y dispensacion di Hulanda caba pa por ‘goberna’ den e supuesto ‘crisis’ cu AVP a laga atras, mientras a aumenta tur su gastonan. Ta poco dia ey a sali un comunicado cu pueblo ta paga 1 miyon pa siman na proyecto, realidad tambe ta cu gobierno ta rancando 5 miyon pa siman di pueblo su cartera y e suma aki ta bai bira mas. Y awor cu tin un crisis y tin necesidad urgente di tal vez un flexibilisacion den palabracion pa cu e situacion mundial y economico ya a uza tur e cartanan caba y ta obliga di pidi pueblo su ultimo debchinan pa mustra ‘caracter’. Asina ki ta dificil pa kere den e lema cu ‘ser humano ta central’ sra Arends-Reyes ta termina bisando.