L.G.Smith Boulevard – Dialuna anochi algo prome cu 10’or un patruya pasando cerca di Linear Park a topa cu un pelea. Esaki tawata entre un adicto y un habitante tegenover di Linear Park.
Mesora agentenan a baha pa mira kiko tawata pasando. Segun a compronde na e sitio, e habitantenan a yega cas y lo a topa cu e tipo aki.
Segun nan e tipo aki lo tawata of a tira piedra ariba e cas y tambe posiblemente lo ta e mesun persona cu algun dia pasa lo a comete ladronicia y/of kiebro na e dicho cas.
Dialuna anochi a bin un confrontacion. Durante e pelea cu un di e habitantenan e adicto a morde e persona parti abou di su cachete banda drechi.
Esaki a causa un herida basta serio, unda cu te hasta un pida carni elo a kita.
Mesora a pidi un ambulance pa mira e herida. Debi cu ambos tawata bringando polis a bay over na detene tur dos.
Un rato despues polis a confisca un chapi tambe cu a wordo usa durante e pelea.
Na yegada di ambulance e homber cu a wordo mordi a cana subi e ambulance pa haya tratamento medico.
Mirando cu Playa no tin Transportwagen mester a warda algun rato pa esun di Santa Cruz yega y hiba e adicto warda di Santa Cruz.
Polis a keda un rato pa compila tur datos posibel di e famia.
