Diaranson Minister di Desaroyo Teritorial, Infrastructura y Medio Ambiente Otmar Oduber conhuntamente cu Director di DIP Haime Croes y Director di DOW Marlon Croes tabatin un encuentro cu e grupo HEXA. E grupo a duna presentacion di diseñonan pa e proyecto di vivienda sostenibel na San Nicolas “Sunrise Heights San Nicolas” cu lo wordo realisa riba e tereno cu recientemente Gobierno a haci limpi unda antes tabatin dependence Martin Luther King / ex EPB. Un tereno cu tabatin un edificio den ruina riba dje pa mas cu un decada y cu tabata un molester pa e bisindario pa motibo di cu entre otro adictonan ambulante tabata uza e edificio pa actonan ilicito.
Maneho di Gobierno
Considerando e gran necesidad pa cas y e limitacion di tereno disponibel riba nos isla, un maneho cu tin di parti Gobierno ta, pa cuminsa construi mas vertical. E concepto di e proyecto ta tipo compleho residencial moderno, innovativo, cu facilidad di ehercicio, piscina y parkeo priva, conhuntamente cu facilidad publico manera cancha di Basketball y parke multifuncional! Pues e lo bira un bon opcion di vivienda atractivo pa esnan den clase media, hobennan profesional of esnan cu ta prefera un hogar tipo condominio.
