Dialuna den oranan di atardi a sosode un caso serio di tiramento na Midle Region, e prome informe cu a drenta tabata wordo bisa cu tres persona tabata envolvi den e tiramento, den cual un persona a muri mesora na e sitio y un otro a muri despues na St. Maarten Medical Center, ambos a fayece di e impactonan di bala ricibi. Mientras dos otro victima a keda interna na St. Maarten Medical Center.
Philipsburg, St. Maarten: Dialuna den careda di 4’or y 45 di atardi, Central di Polis di St. Maarten a ricibi varios yamada, cu tabata informando di un tiramento cu a tuma lugar na Middle Region Road, den becindario di Samuels Bakery. Mesora diferente unidad di polis, departamento tecnico di polis y ambulance a bay na e sitio.
Na yegada, e polisnan a topa cu un homber cu tabata sangrando hopi y tabata tin varios heridanan di bala di arma di candela. E homber aki no tabata duna señal di bida mas. Na e sitio tabata tin dos otro victima masculino cu tambe a ricibi varios tiro di arma di candela, ambos nan situacion tabata hopi critico.
Victima cu a perde su bida den e tiramento
Personal di ambulance a transporta ambos victima cu hopi urgencia pa hospital.
Despues di un rato e recherchenan a ricibi e informacion cu un di e victimanan cu un rato prome a wordo transporta pa hospital tambe a fayece.
Poco rato despues polis a ricibi un yamada cu tin un di 4 victima, kende a aparece cu impacto di bala, pero su situacion no tabata serio.
Vocero di Polis, Josepha a duna di conoce cu e detayesnan di e tiramento no ta mucha cla ainda. Tambe e vocero a desmenti e informacion cu tabata circulando, cu tabata trata di un drive-by shooting.
Josepha a splica cu enberdad un vehiculo a yega na e sitio, dos homber a baha for di e auto y a cuminsa basha bala, den cual dos persona a perdenan bida y dos otro ta interna na hospital y un di nan su situacion tambe ta critico.
Team di recherche ta haciendo e investigacionnan necesario. E identidad di e victimanan envolvi no por a wordo verifica.
E team di recherche encarga cu e investigacion, ta pidi tur hende cu por a mira algo,pa porfabor tuma contacto cu polis di St. Maarten na number +1 721 542 22 22 ext. 204/205. of por haci uso di Tiplijn, 9300.
Tambe por bishita e website di polis www.policesz.sx of por laga un message via Facebook page (Police Force of St. Maarten – Korps Politie Sint Maarten).