Dedica na Ignario Maduro, cariñosamente yama “Nashi” *19 september 1915- + 24 Oktober 1980.
Antes na un edad hopi jong, muchanan tabata wordo kita for di scol pa yuda na cas y pa traha den cunucu. Mucha muhernan tabata bay scol y ora nan haya nan menstruacion (regla), hopi famia tabata kita nan yiu muhernan for di scol, paso antes famianan tabata haya 8, 9, 10 of tin ta haya mas cu 10 yiu y esaki ta bira dificil p’e mama mira pa tanto yiu asina, e yiunan mayor tabata keda cas pa weita pa e rumannan chikito, of den cierto casonan no por a sigui studia, paso mester a bay traha pa por yuda cria e rumannan chikito.
Tambe den e tempo ney hendenan tabata casa na un edad toch basta hoben y e damitanan aki mester tabata prepara pa ta un bon esposa, bon mama y pa atende cu cas. E mucha hombernan tabata bay yuda tata den cunucu pa nan siña planta, cria bestia of bay pisca cu nan tata, tur esaki ta experiencianan pa mayan nan por percura pa nan famia come. Asina e mentalidad humilde di e Arubiano tabata den e añanan rond di 1920 pa 1970. Tur cos tabata depende di e famianan y nan clase social.
Poco poco e mentalidad aki a cambia, cu awendia toch yiu muher y yiu homber ta hayando mesun derecho y oportunidad di sigui studia.
Esaki ta e storia di un mucha homber balente di San Nicolas cu semper a traha duro pa bay dilanti.
Ignario “Nashi” ta para na banda robes, foto 1950
Watapana Gezaag, San Nicolas: Ignario Maduro a nace dia 19 di September 1915, manera tur famia cu tabata biba di cunucu, tempo cu Ignario tabata ta den vierde klas, e no por a sigui scol mas, pa motibo cu e mester a kita pa yuda su tata planta cunucu. E cunucu di su tata tabata na Watapana gezaag.
Tempo e tabata mucha, e tabata ta bay cu burico y cu halifat busca awa na un pos na Sero Preto (San Nic.) Asina ela siña for di su tata y cu tempo e mes a cuminsa coshecha, Boonchi, Maish’i rabo y Yambo na gran cantidad. Tambe e tabata tin hopi mata di Mispel.
Nashi no tabata planta so, pero e tabata cria bestia tambe, e tabata tin cabrito, carne y porco, cu tur e trabou como cunucero y criado di bestia, asina mes Nashi tabata resta tempo pa bay pisca na baranca y piki cangreu. Awa pa su matanan y bestianan e tabata bay busca na un pos cerca di Watapana Gezaag y for di un dam na Fontein.
Nashi tabata coba y traha dam pa hende, ela coba y traha hopi dam den su bida. E tabata musico tambe, e tabata toca e tempo ey cachete di burico, cu tabata wordo usa como instrumento.
Nashi tabata un di e prome personanan cu tabata tin un auto den e becindario di Butucu y Rooi Congo. E tabata tin un Carioca, cu su Carioca e tabata transporta hende y tambe tabata yuda hende transporta palo y otro carga. Nashi su carioca tabata di multi uso, hende malo e tabata hibanan dokter, te hasta como shersh su carioca a yega di wordo usa, ela transporta morto pa santana. Su plaachi number tabata A 105, e number aki ela mantene pa hopi tempo.
Esaki ta un carioca cu tabata wordo usa pa transporta hende
LAGO
Cu tempo tabata transcuri Ignario Maduro a haya trabou na LAGO, como Operator/tractor, aki ta caminda ela traha te cu ela bay cu pensioen, ora a kere cu Nashi ta bay gosa di su pensioen, ainda Nashi a bay traha poco tempo mas na Johnson Enterprises.
Dia 24 di Oktober 1980, Nashi a cera su wowo pa semper y a bay sosega, un arubiano cordial y balente.
Nos di Arubanative.com no conoce Ignario Maduro y ni su famia, pero e informacion di Ignario Maduro, nos a haya for di nos Fuente cu ta sr. Dufi Kock y cu su permiso nos a publica e historia di un persona cu sigur tabata mustra hopi balente y hopi cordial. Su famia sigur mester ta hopi orguyoso di Nashi Maduro dfm.
Fuente: Buki publica na 2010 titulo: Cariñosamente… Recuerdonan di mi wela y otronan. Autor José Miguel S. Donata. Pagina 25. Ricibi di Sr Dufi Kock.
Fuente di potret: FB. Nos dushi Aruba di antaño