Fondo di 40 Myon Euro pa e 12 paisnan OCT den Caribe
Un aña pasa, 25 di cctober 2018, durante Caribbean OCT’s Resilience Summit na Sint Maarten, Prome Minister Evelyn Wever-Croes hunto cu 11 otro representante di Islanan di Caribe, a firma un convenio cu Union Europeo cu ta pone 40 miyon Euro disponible pa 12 paisnan OCT (Overseas Countries and Territories) di Caribe por uza e fondo aki pa traha riba 3 area.
E siman aki, e management team, ‘Expertise France’, cu ta encarga cu ehecuta e proyecto regional di e di 11 EDF, (European Development Fund), a cuminsa cu bishitanan na Aruba y nan a cuminsa cerca Prome Minister. Durante e dianan aki nos teamnan local lo presenta proyectonan riba e tres area aki.
E prome area: Energia y eficiencia den uzo di energia
Aki kier enfoca mas riba e eficiencia, pues con pa gasta menos energia, locual ta pas den e vision di Gabinete Wever-Croes. Gobierno di Aruba no ta enfoca riba visionnan cu no ta realistico manera tawata tin den pasado. Nos ta recalibrando e vision cu e meta pa yega na e punto cu Aruba por ta completamente independiente di crudo, y bay over na un combinacion di gas y diferente fuente di energia alternativo. Y mientras tanto, Aruba lo enfoca riba eficiencia. Nos enfasis ta bay mas pa enfoca riba haci energia mas barata y baha e gastonan na Aruba.
E di dos area: Conservacion di nos area marino
Esaki ta encera e atencion duna na nos bida marino, cu ta sumamente importante pa Aruba mirando cu turismo ta nos unico pilar economico. Hopi di nos turistanan ta bin Aruba door di nos area di beach sumamente bunita y tambe door cu nos tin un area marino. Nos mester proteha e area aki pa cua tin fondo den e 40 miyon Euro.
E di tres area: Miho preparacion pa calamidad
Con ta previni disaster y con pa prepara miho pa disaster ta un tema di importancia y hopi actual tambe na Aruba. Bou di e tema aki, Aruba lo atende cu e efecto cu e crisis migratorio Venezolano tin riba nos pais, mirando cu nos ta considera esaki un calamidad na Venezuela cu tin un impacto grandi na Aruba.
“Mi ta hopi contento y satisfecho cu Aruba por tin e fondo aki disponibel pa cubri diferente maneho di Gobierno den e 3 areanan menciona. Den e temponan aki financieramente dificil, tur ayudo cu nos por haya ta bon bini”, Prome Minister Evelyn Wever-Croes a expresa.