Aruba tin su historia, su parti bunita, su parti menos bunita y su parti hopi scur.
Amor pa yiu of ta pa tapa berguensa?
Nos tur den bida ta nace, ta crece y ora amor bati na nos curason, nos ta habri nos curason pa ricibi’e, sin importa color, rasa, sexo, religion etc. Sin por controla y sin por pidi aprobacion di otro. Esaki lo ta e motibo pakiko e mama lo a cera su yiu muher asina hopi tempo, paso e no a aproba e amor di su yiu y a prefera pa su yiu biba añanan di sufrimento, dolor, amargura, sin por biba e felicidad di namora, casa y forma un famia cu e prome amor di su bida.
Boegoeroei: Tabata dos di Juli 1955, den oranan di mainta, awa tabata basha, for di leu por a scucha alarma di polis, ambulance acercando e bario di Boegoeroei.
Polis ta topa cu un dama hoben cera den un cuarto chikito
E alarma y e autonan di polis y ambulance a para dilanti di un cas, batayon di polis a baha y a bin den nomber di La Reina (e tempo ey) pa haci loke nos ta yama actualmente un entrada hudicial, pa motibo cu tin hopi redo ta coriendo rond cu na e cas aki lo tin un hobencita cera den un cuarto. E mama no por a haci nada otro y laga autoridad haci su trabou.
Asina aki e hobencita S.T. di e tempo ey di 22 aña a wordo libera, noticia a core rond manera awa, mirones di tur parti di Aruba tabata pasa pa mira cua tabata e cas, hendenan den e bario tabata bisa cu e mucha muher S.T. tabata una beyesa, pero ora ela wordo libera su cabey a crece te na su pia abou y su huñanan a bira asina largo te cu nan a krul.
E dama a wordo hiba Hospital y despues Korsou
Despues cu e damita aki a wordo libera, ela wordo hiba San Pedro Hospital, segun nan ta conta, cu e damita aki a perde conocimento y no tabata tin niun clase di sentimento mas, e damita no tabata demostra ni alegria, ni tristesa, e tabata cera den e condena cu su mama a hinke den dje. Ela keda dos siman interna na hospital na Aruba y despues ela wordo manda Corsou pa haya un tratamento mas avansa y pa asina por mira si e por recupera bek.
E damita a nace cu un malesa
E damita aki a nace aparentemente na 1933, pero ora ela nace hopi liher su famia a bin ripara cu e ta sufri di un of otro malesa, den cual e ta haya un ataca y ta keda pa varios dia malo. Hende tabata bisa cu lo por tabata tin Epilepsia, pero esey nunca a wordo confirma. Pa e motibo aki semper e mama tabata pone extra atencion riba dje y tabata trata na haci tur cos pa su yiu muher pa motibo cu e ta malo.
E prome amor
E damita aki a sigui crece y a bira un señorita masha bunita mes, tur hende den bario tabata bisa cu e tabata hopi bunita. Un dia ela bay haci respondi pa su mama y na caminda lo a topa cu un cabayero cu a toca su curason pa prome biaha cu palabranan bunita. Aki cupido a manda un flecha straight den curason di e damita cu a coresponde e cabayero aki bek.
Tabata riba un Diabierna cu e damita aki a bay haci respondi pa su mama y a bolbe topa e cabayero aki. E biaha aki si e damita no por a resisti mas e tentacion y a entrega su mes na e prome amor di su bida. E tabata hopi felis y a lubida cu e mester a regresa cas. Ora y dia a pase voorbij, te ora cu Diadomingo mainta su mama hopi preocupa a dicidi di sali pa bay busca su yiu muher. Mientras tanto den bario di Boegoeroei tabata core rond cu e mucha muher bunita aki a desaparece. E mama na prome instante a pensa cu su yiu lo a haya un ataca y lo a cay den mondi caminda niun hende ta pasa cu por yude. E mama tabata den un angustia, te ora cu ela topa su yiu.
Mama ta desaproba e amor di su yiu muher
E mama tabata hopi rabia cu su yiu a pone berguensa na su cara, pasobra den bario nan tabata haci redo cu e mucha muher aki a bay cu un homber y cu ta e homber a bin bahe bek den Boegoeroei.
E mama tabata hopi rabia paso ela bay cu un homber color scur, bendedo di pisca henter un weekend y cu ela perde su inocencia cu e homber aki. E mama den su rabia a bay polis, keriendo cu polis lo cera e homber, pero e homber a bisa polis cu e ta stima e mucha muher S.T. y cu e kier casa y forma un bida cune. Polis na su turno a informa e mama di esaki, e mama mesora a desaproba e proposicion aki, ela bisa polis cu su yiu a nace cu un problema y cu e ta malo. Segun e mama e mucha muher aki nunca no por forma un bida y no por mira pa un famia, pa via di su malesa. Tambe e mama a pidi polis pa enbes di trata na casa su yiu cu e homber ey, pa porfabor busca un lugar pa interna su yiu.
Mama ta condena yiu cu castigo di isole pa añanan largo for di mundo
Nan a regresa cas y e damita S.T. no por a controla e amor cu e tabata tin pa e homber di su bida. Manera anochi cera y su famia bay drumi elo tabata huy pa topa cu su amor. Esaki a sigui pasa te dia cu e mama a gare y a dicidi di hink’e den un cuarto masha chikito full isola di mundo, te hasta e bentananan tabata claba.
Un cuarto chikito, full cera ta unda ela pasa algun aña di su bida
Manera cacho cera den un hokie cu un pida paña bieu benta riba vloer pe drumi, e damita aki a pasa su añanan cera. E damita a yora, a grita, te cansa, te perde gevoel di tur sentimento paso nada no tabata yuda pa salbe di e condena cu su mama a dune.
Fin di su condena
Su condena a caba dia 2 di juli 1955, despues cu autoridad a tuma e tantisimo speculacionnan y rumornan cu tabata circulando den e bario di Boegoeroei na serio. Y a haci manera un entrada hudicial na cas di e famia T. Segun e mama ta dos aña so ela cera su yiu, pero bisiñanan tabata bisa cu ta den careda di 7 aña.
Sospecho grandi di mas casonan asina
Segun autoridad e tempo ey nan no ta descarta cu por tabata tin mas di e caso nan aki na Aruba. E tempo ey si bo ta special, of bo tin cualke enfermedad mental, tabata manera berguensa pa un famia y pa tapa berguensa nan tabata escohe di cera nan sernan keri den un cuarto of camber, pa hende no miranan y no papia ribanan.
Algun aña pasa na Piedra Plat tabata tin un caso similar
E caso aki no ta e unico, ta wordo specula cu tin mas caso asina a pasa na Aruba y lo por ta a pasando. Nos a haya un informacion no oficial cu algun aña pasa un caso similar a wordo descubri na Piedra Plat, caminda un mayor a cera su yiu homber pa algun aña den un camber. Famia y bisiñanan tabata pensa cu e mucha homber aki lo tabata studiando den exterior. Na momento cu autoridad a drenta pa saca e hoben aki, nan a haye den un estado hopi deplorabel, tur sushi y su pia tabata tur na herida, no ta conoci si ela logra scapa su pia of nan a amputa un parti di dje. E hoben aki algo a pase cu e tata aparentemente lo a cere den un camber pa aparentemente 10 aña largo, paso elo tabata tin un of otro problema mental. Esaki nunca a sali den publicidad y nunca niun persona a wordo persigui pa esaki tampoco
Ruinerwold 6 persona isola di mundo a wordo descubri
Recientemente un caso similar na Ruinerwold, Drenthe, Hulanda tambe a wordo descubri, caminda no un persona, sino 6 persona a keda 9 aña cera den un camber scondi den un boerderij basta bandona den mondi.
Nos a haya sa di esaki y di esun di Piedra Plat, cu tambe tabata tristo. Nos no conoce ambos famia y ni e victimanan, si nan ta na bida y mucho menos nomber y fam. pero si un persona sa cu un otro ta wordo teni manera prisonero contra su boluntad den un cas of cuarto etc. mester avisa autoridad. Pasobra si un persona ta sufri di cualkier enfermedad mental, e mester ta bou tratamento di un medico y como prisonero di famia.
Enfermedad mental no ta un berguensa, tin tratamento pa control’e.
Nos como ser humano cu no tin e conocimento di trata cu personanan cu problema mental, no por tuma un desicion di cera un ser keri di nos como un prisonero, paso esaki tambe ta un abuso y sigur un trauma pa e victima.