Paradera – Diaranson mainta den careda di 11’or, polisnan di Trafico a cera e caminda dilanti Great Rich Bar & Restaurant, unda cu den oranan di marduga a sosode un accidente di auto hopi serio.
Diaranson marduga pa mas o menos 3:45 un hoben na stuur di un Nissan Skyline a perde control y a dal cu velocidad halto contra un palo di luz.
Durante e accidente e agentenan na e sitio no a sinti e necesidad di a avisa Departamento di Trafico, posiblemente door cu e chauffeur tawata na tino, pero si e tawata kehando di hopi dolor mes.
Durante dia esta den oranan di mainta dokternan a hinka e hoben den Coma, debi cu ela ricibi multiple trauma y lo tin sangramento interno tambe.
Mirando cu su situacion lo a bira mas serio, esaki a pone cu mesora a cuminsa cu e preparacionnan necesario pa sali cune mas lihe cu ta posibel pa Colombia.
Polisnan di trafico a presenta na e sitio ora cu informacion a drenta di e con serio e situacion di e hoben chauffeur ta of a bira. Pa e motibo aki nan a cuminsa cu e investigacionnan necesario na e sitio caminda e accidente a tuma lugar, nan a cera e caminda di Paradera na altura di Great Rich Bar & Restaurant, pa por haci e investigacionnan necesario.
Awacero a hunga un rol
E awacero di mainta a hunga un rol grandi y a obstaculisa e investigacionnan y sin conta cu hopi auto a pasa caba ariba e spoor(rastronan) nan cu ta necesario den e investigacion.
Great Rich ta dispone di camera, pero e no ta poni den e angulo unda e accidente a pasa.
Tin un camera so cu lo por yuda polis y esey ta na e mast halto di Setar, si e ta den funcion esey lo por indicanan kiko exactamente a sosode.
Speculacion tin varios, pero mester di prueba di contundente.
MAART 18 ULTIMO
E hoben aki ariba e fecha di 18 di Maart (ultimo) a haye envolvi den un accidente di auto caba, tambe segun nos a compronde e tawata tras di stuur di un otro Skyline y esaki a sosode altura di Cas Casuela.
Segun informacion cu nos ta dispone di dje, e dia ey, ela ricibi sla tambe, pero no tawata di e serio ey.
Diaranson marduga e no tawata tin mesun suerte cu na Maart y ta resulta seriamente herida.