Home Politics Prome Minister Evelyn Wever-Croes: Gobierno di Aruba a yega na acuerdo...

Prome Minister Evelyn Wever-Croes: Gobierno di Aruba a yega na acuerdo cu Citgo ARUBA TA HAYA YABI DI REFINERIA Y TERMINAL BEK

SHARE

ORANJESTAD – Durante un conferencia di prensa extra ordinario, Premier Evelyn Wever-Croes hunto cu coleganan minister, a informa prensa y comunidad di e bon noticia cu a logra yega na un acuerdo cu e refineria pa Aruba por haya e yabi di e refineria y e terminal for di Citgo. Esaki ta pa permiti Gobierno di Aruba busca otronan cu ta interesa den opera e terminal y e waf, y e refineria tambe. Mes momento ta garantisa derecho di trahadonan di e compania. Apesar cu no ta empleadonan di Gobierno, Gobierno di Aruba a insisti pa e derechonan di e trahadonan wordo salvaguardia tur momento.

REFINERIA
Cu e firmamento di e MoU, Gobierno di Aruba por cuminsa negocia cu otro partidonan interesa. Ya caba tin un lista di mas di 25 compania cu a expresa nan interes den ultimo tempo, sinembargo Gobierno no por a negocia cu nan, pa haya sa si nan ta partnernan serio. Awor si esaki ta posibel. Gobierno lo no limita su mes na e lista di compania aki so. Gobierno lo bay busca activamente na mas inversionista, entre otro door di tene un road show na Houston, caminda tin inversionistanan serio, pa lanta nan interes pa inverti na Aruba. E comision encarga cu negosacion lo wordo formalisa dentro di poco. Riba peticion di sindicato, empleadonan tambe lo wordo envolvi den e proceso aki. Gobierno ta buscando un partner serio, cu tin e fondo pa inverti mesora den e refineria, pa hasi’e un refineria ‘state of the art’, cu ta cumpli cu standardnan medioambiental, cu ta paga su fair share na caha di Gobierno, y cu ta trata su empleadonan bon.

TERMINAL Y WAF
Cu e firmamento di e MoU, Gobierno ta haya control di e waf y di e tankinan. Tur hende ta corda e bon temponan di Wickland Oil, cu a opera e tankinan cu hopi ganashi. Citgo ultimo tempo a neglisha e tankinan. Y apesar cu nan falta hopi mantencion, nan tin un balor hopi halto. Gobierno di Aruba ta bay percura pa e negoshi aki bira uno hopi exitoso cu ta genera hopi entrada pa Gobierno, y cu lo crea hopi cupo di trabou.

EMPLEADONAN
E punto di salida di Gobierno ta cu tur empleado mester keda cu nan trabou, en todo caso mas tanto empleado posibel, bou di e operador nobo. Citgo a indica anteriormente cu tanten cu no ta sigur si empleadonan lo wordo tuma over pa e operador nobo, y Citgo mester paga nan cu tur nan aña di servicio, cu Citgo no tin placa pa esey. Sinembargo aki e forsa di negosacion di Gobierno a hunga un rol grandi, y a pone como condicion mas importante pa Citgo cu nan mester paga tur loke nan debe na trahadonan, contratistanan y otronan cu nan debe. Premier Evelyn Wever-Croes a indica cu e empleadonan ta importante pa Gobierno y nan interesnan mester bin na prome luga.

Gobierno di Aruba ta hopi contento cu e bon noticia aki, cu a yega net na un bon momento. Pasobra mientras cu CAFT ta insisti cu Gobierno mester tuma medida, Gobierno di Aruba ta scoge pa busca alternativanan economico, pa cera e gap financiero, y e hecho cu ta haya e yabi di e terminal y e refineria, ta un di e alternativanan ey. Den nomber di Gobierno, Premier Evelyn Wever-Croes a gradici e comision cu a negocia fuertemente cu Citgo, y a logra e logro importante aki. Tambe Prome Minister a gradici colega Ministernan y pueblo di Aruba pa e confiansa y sosten.

Gobierno di Aruba ta felicita pueblo di Aruba pa e bon noticia aki, cu ta mustra cu si bo tin determinacion, y bo ta kere den un causa, bo por realis’e.