Parlamentario Endy Croes ta indigna na e manera cu Parlamentarionan di AVP, esta tanto Richard Arends como Benny “Avestruz” Sevinger ta burla di e instituto Parlamento. Parlamento ta conoci como e organo di mas halto di Pais Aruba. Pues rond mundo un Parlamento ta un instituto respeta y bo mester ta digno pa por representa pueblo den dicho cas, esta e cas di pueblo Parlamento di Aruba. Ultimo dos luna tin hopi sorpresa a keda bin ariba. Ta manera cu e cashi pandora di AVP ta un bari sin bom of ta un tunnel sin final. Despues di dos aña ainda Parlamento ta encontra documentonan nobo como sorpresa.
Bagamunderia di Richard
Poco siman atras durante un reunion den Parlamento colega Edgard Vrolijk a presenta un contracto di Richard Arends como CFO, esta Director Financiero di RDA cu un salario di Afl. 22.750,- pa luna yena cu tur sorto di beneficio cu ta alcansa 2.6 miyon florin si kier retir’e. Parlamentario Endy Croes a trece prueba alrespecto esaki unda dia 30 di november 2016 – momento cu Richard Arends a huramenta mainta como Minister – ainda e mesun anochi e tabata autorisa pagonan “online” di miles di florin pa RDA. Asina mes Richard a sali den prensa gañando cu nunca el a eherce e trabao ey. Parlamentario Endy Croes ta bis’e “al otro perro con ese hueso”. Pues “online” system di banco no ta gaña y pruebanan ta riba mesa.
Bagamunderia di Benny
Siman pasa mientras nos ta preparando pa trata e ley di Serlimar den oranan di mainta por a tuma nota den prensa cu Ministerio Publico a haci “huis inval” na un cantidad di adres y entre otro na cas di ex Minister di Infrastructura Benny Sevinger cual caso a carga e nomber di Avestruz. Benny a wordo acusa pa 5 cargo, esta valsheid in geschrifte, oplichting, het aannemen van steekpenningen (aldan niet handelend in strijd met zijn plicht), misbruik van zijn functie en opzettelijk /gewoonte witwassen. Pues Benny awor ta un sospechoso principal cu 5 cargo pisa contra su persona. Ministerio Publico no a yega na e acusacionnan aki sin base legal y tempo lo demostra e desaster, corupcion y fraude den e caso grandi aki di tereno.
Tene honor na bo mes y retira
Parlamentario Endy Croes ta sinti cu un Parlamentario – momento cu bo bira sospechoso – lo ta na su lugar pa tene honor na bo mes y entrega bo retiro. E instituto Parlamento bou di AVP den e ultimo 8 añanan a wordo malamente castiga y nomber di Parlamento danki na AVP ta den luz negativo. No ta husto pa esnan cu si ta traha duro tur dia mester carga e mancha di “boefnan” di AVP kendenan kier a enrikece nan mes na un manera ilegal. Cuminsando cu Paul Croes ex Presidente di Parlamento cu tin un castigo di prison di 4 aña riba su nomber pa bagamunderia cu el a sinta haci cu ontheffing. Richard Arends kende a strica 2 miyon florin den gobierno y cu Horizon Consultancy a cobra 585 mil na Utilities mas 485 mil den RDA banda di a fix su mes un contracto miyonario. Dicon politiconan y candidatonan riba lista di AVP mester ta asina? No ta normal. E mancha riba Parlamento di Aruba mester wordo kita. Politiconan abusador cu sed pa placa mester por cuminsa na entrega nan retiro.
Parlamentario Croes ta haci un apelacion humilde na Richard Arends y Benny Sevinger pa boso tene honor na boso mes y entrega boluntariamente boso retiro como Parlamentario. No ta saludabel pa otronan mester traha hunto of banda di bosonan den e cas di Pueblo. Parlamentario Croes ta finalisando un documento cu lo wordo manda Hulanda, tanto pa Rijksministerraad y Rey Alexander den e caso specifico aki.
