Parlamentario Endy Croes ta splica mas alrespecto e ley conoci como e Ley di Serlimar esta e Ley di Servicio di Limpiesa di Aruba (AB 2005 no. 5). Manera ta conoci den e primera tanda cual a tuma lugar diaranson 2 di october ultimo cu un sala carga cu publico un total di 20 Parlamentario a hiba nan disertacion y Minister di Infrastrucura Otmar Oduber a contesta pa casi 3 ora largo aclarando masha hopi inkietud di e diferente stakeholdersnan. Den e proceso durante e reunion Minister Oduber a presenta Nota di Cambio pa cu e Ley y mescos Parlamento a presenta un amienda cu ta regarda atencion na diferente punto den e Ley di acuerdo cu rondanan di consulta cu a wordo haci cu diferente stakholders manera AHATA. ATIA, KVK, habitantenan di Simeon Antonio pa nombra algun.
Rapport di PAHO
Parlamentario Endy Croes a ta sigui splica cu a bay campaña cu promesa cu lo busca un solucion pa e problematica di Parkietenbos. Den programa di gobernacion ta stipula cu lo soluciona e problematica di Parkietenbos. Rapport di PAHO (Panamerican Health Organisation) di maart 2018 despues di a haci un evaluacion profundo a conclui cu ta urgente pa stop tur actividad na Parkietenbos. Den e rapport a menciona un serie di “malesa“ cu e situacion aki ta produci pa e ser humano y no por sigui asina sin mas. Dump Parkietenbos ta existi pa 70 aña y pa hopi aña ta en busca di un solucion. Despues cu a ricibi e rapport devastador di PAHO, cu mas intensidad a sigui traha pa por yega na un solucion. Solucion sinembargo no por bin adhoc sino ta bin den contexto di diferente paso.
Contracto cu Ecogas
A cuminsa cu un solucion temporario pa tur e sushinan comercial y residencial. Aki gobierno a firma un contracto cu Ecogas unda tur compania incluso Serlimar ta hiba 100% di e sushinan comercial y residencial pa Ecogas kende na su turno ta separa esakinan y finalmente ta compacta esakinan den bails di alrededor 1.2 ton pa cada bail. E bailsnan aki ta wordo dera pa Serlimar na Seri Tijshi. Pues alrededor 70 mil ton pa aña na sushi residencial ya caba no ta bayendo Parkietenbos mas. Restante di sushi cu ta mas o menos 20% di sushi total ainda ta bay dump. Intension di e ahustacion y cambio den Ley di Serlimar aki ta pa yega na fondonan cu lo bay sostene e idea pa cera Parkietenbos y habri un Sanitaire Landfill nobo structura y controla.
Aporte di pueblo, comercio y turista
E ley ta data desde 2005 y na 2015 AVP a reenforsa e cobramento di Afl. 25 florin pa pueblo cual suma tampoco lo mishi cune den e cambionan actual cu ta riba mesa. Lo busca e balance corecto pa – banda di e Afl. 25,- cu pueblo lo keda aporta – comercio y turista tambe contribui cu nan fair share. Asina comercio cu nan companianan registra na KVK lo bay contribui cu Afl. 300,- pa aña y turistanan lo bay contribui cu 1.5 dollar pa camber pa anochi. Den e 3 aspectonan aki esta Pueblo, Comercio y Turista gobierno ta buscando e balance corecto pa por ehecuta e deseo tan anhela di Simeon Antonio y henter pueblo di Aruba esta cera e dump na Parkietenbos den combinacion cu habri un Sanitaire Landfill nobo completamente structura. Hunto cu aporte di Parlamento y stakeholdersnan y e boluntad di gobierno pa keda ahusta e ley pa un producto final sostenibel pa tur partner.
Parlamentario Croes ta mira cu nos lo tin un producto final otro siman diamars cu lo wordo carga pa mayoria cual lo cumpli cu e meta final: E solucion pa Parkietenbos!
