Oranjestad: segun sra Arends-Reyes tin e impresion cu di berdad Enseñansa ta bou atake y ta keda haña hopi sla for di gobierno di MEP POR RED. Gobierno ta anuncia un cambio despues ta suspende y bisa tur cos a keda mescos pero na final toch ta voer e door. Un ehempel bibo ta ora cu a anuncia cu lo bai corta gasto drastico pa Enseñansa y cueste loke cueste ta bai corta den overuur di maestronan. Minister a duna instruccion per direct den un carta manera aña escolar a habri cu lo corta riba 15 miyon den salario di maestronan na overuur of taakuur, despues Minister a sali afor y bisa cu no lo hasi’e y tur cos ta cana normal.
Scol a habri na augustus y ya pa e payroll di september despues di e manifestacion di maestronan, casualidad of no, maestronan na Aruba a haña un sla grandi y a nota cu tur falta sumanan cu ta varia entre 80 fls te sumanan cu ta yega 1200,- cu a conta riba dj’e cu ya a trah’e caba na augustus. A bisa den media cu lo ta fout di Financiën pa cu e NPR e nieuwe pensioen regeling cu ta e sumanan cu por yega te fls.100,- cu falta. Tambe tin maestronan cu a haña via email cu nan lo wordo paga retroactivo locual nan falta te na fin di oktober pa motibo cu Minister a cambia su beleid di overuur y taakuur Y nan lo ta bezig cun’e. E sumanan mas grandi tin que haber cu of overuur of toelagenan riba nan salario cu nan no a ricibi tambe lo no perde. Despues di algun siman a sali den media cu tur maestro lo ser paga locual nan falta, tur maestro a keda den tension door cu un suma di mil florin of mas no ta wega y nan tambe tin nan responsabilidadnan financiero pa cumpli cun’e.
Esnan cu tawata falta e suma di NPR cu no ta pasa 100,- a haña nan sen laat, esnan cu a cobra salario basico tin algun cu a haña locual nan tawata falta y tin algun maestro cu ainda awe no a ricibi ningun sen extra pa motibo cu despues cu scol a cuminsa, despues cu tawata tin un acuerdo cu nan cabesante y a traha e over uur y taak uren nan, nan ta tende cu e ‘spelregels’ a wordo ahusta toch. Nan no lo haña e taakuur of overuur nan ey mas paga pa motibo cu e stichting ta pidi pa bezuinig. Tur e cambionan aki y tardansa a pasa sin cu nan a ricibi un specificacion detaya di e suma cu nan a haña back si nan a haña algo back. Maestronan a cobra sin haña un salaris slip digitalmente of hard copy manera custumber. E pregunta e ora ey ta keda dikon maestronan ta wordo trata asina na Aruba?
Dikon ta net maestronan mester ta e dupe di tanto decisionan desventahoso.
Di mes cu tin un scarcedad enorme na maestro na Aruba, si nan bai manifesta nan ta wordo lastra den media cu nomber pa politiconan cu ta sostene gobierno, riba social media tur e fake accountnan liga na Ministernan y partidonan ta conosi ken ta nan tras y nan ta scohe pa intimida maestronan cu ta atende reunion prome cu a bai manifesta. Asina ki si ta dificil pa Aruba por sigui llama su mes un pais liber y democratico. Na Aruba na e momentonan aki hasta companianan cu vocifera nan mes contra un maneho di gobierno ta wordo intimida of ta saca informacionan di nan. Tur persona of grupo cu ta sinti nan mes cu nan lo kier vocifera nan opinion mester tin e espacio pa hasi esaki, ta nan pleno derecho. Awor ta keda un llamado na e maestronan pa no acepta e mal trato cu net Enseñansa ta sufriendo, mientras Enseñansa no mag gasta fondo pa renoba algun scolnan cu mester un renobacion grandi, otro Ministerio si ta bayendo den procesonan pa bidding pa un centro di 80 miyon den un PPP constructie. Mientras Enseñansa mester cremencha y maestronan ta keda haña sorpresa desagradabel, otro companianan cu gobierno ta subsidia si ta buscando mas fondo na Parlamento pa percura pa salario di trahadornan.
Maestronan den un manifestacion ultimo a pidi pa Parlamento llama un reunion publico prome cu vakantie di oktober y aki tambe nan no a haña oido. Scucha nan ta un y hasi trabou di nan peticion ta otro. Minister tawata den exterior, a bolbe y ya practicamente vacacion escolar pa oktober ta bai cuminsa y nada di reunion cu nos maestronan a pidi. Ta sumamente lamentable cu pais Aruba a yega na un punto asina cu ta corta den Enseñansa, nos futuro. Cada inversion den Enseñansa bo lo cosecha back y den caso cu ta sigui trata maestronan asina y ta corta den Enseñansa e repercusionan di e decisionan aki lo bin pa nos comunidad despues sra Arends-Reyes ta termina bisando.