ORANJESTAD (AAN): E ultimo reunion di Kiwanis Club of Aruba pa e aña Kiwanistico 2018- 2019, cu a tuma lugar na Fish House Restaurant tabatin su toke diferente, unda a gradici e miembronan pa nan dedicacion y amor pa sirbi e comunidad di Aruba.
Tumando e reto pa presidente di e club di Kiwanis cu mas aña di existencia na Aruba, ta representa un responsabilidad y compromiso firme. Un compromiso cu sigur Edalitza Weller a sa di demostra di a cumpli cabalmente conhuntamente cu e sosten di e miembronan, cu como boluntario ta traha na bienestar di e comunidad y primordialmente pa e muchanan di Aruba. Mester remarca cu Edalitza ta e presidente femenino mas hoben y alabes e prome “SLP” femenino pa bira presidente di e club.
Durante e aña a ehecuta exitosamente un cantidad di proyecto manera; Paga Tino! “School Traffic Signs” proyecto pa seguridad den trafico. Den e proyecto a participa Cuerpo Policial, DOW y Watty Vos Boulevard Project Company. Un total di 24 borchi a wordo instala na scol basico y preparatorio. Universal Children’s Day, No Sconde Mas y Kiwanis One Day na Colegio Felipe B. Tromp. Kiwanis Club of Aruba a participa cu un stacion den Global Money Week na luna di november 2018 y maart 2019 organisa pa Banco Central di Aruba hunto cu otro instancianan financier. Pasco den Bario, Bikes Back 2 Life, Competencia di Flie, Bon Bista, Smile Makers y Back 2 School. Como tambe campaña di conscientisacion den trafico Kiwanis Club of Aruba conhuntamente cu New India Assurance a lansa “Join the movement DNT TXT & DRIVE” e prome video a wordo lansa na luna di februari cu Alto Comisario di Polis Sr. Andrew Hoo, y e di 2 video cu e atleta hoben Karyme Acosta a na luna di Juni. Traffic Thermometer retonde di San Nicolas, Fiesta cu nos Grandinan, Kiwanis Hands-On Day na Anglo Kleuterschool, Clint Whitfield Oustanding Student Award y Oscar Antonette Exceptional Student Recognition.
Kiwanis Club of Aruba a haci donacionnan substancial na diferente organsacion manera; YMCA, Wit Gele Kruis Aruba, Fundacion Muchila Creativo, storia di mucha “E Cuebanan Scur”, Fundacion Siñami Paso pa Paso Aruba, Stichting Thuiszorg Aruba, Casa Cuna, Stichting Trampolin pa Trabou y Grupo Scout Cacique Macuarima. Conhuntamente cu e otro clubnan di servicio a haci un donacion tambe na Flatstone Ballpark.
Pa realisa e cantidad di proyecto- y donacionnan menciona ta danki na e fondonan recauda di e 2 eventonan grandi cu ta ser teni anualmente, cu ta Wine Gala Charity Gala of Thrones y Fundraising Golf Tournament. Como tambe den temporada di fin di aña e proyecto di “Secure breakfast for a child for one month”.
Cu e compromiso pa guia y ekipa e muchanan pa ta lider mayan den nos comunidad, Kiwanis Club of Aruba ta sponsor 5 “Service Leadership Clubs”; Key Club Colegio Arubano, Key Club San Nicolas, CKI EPI, Builders Club Mon Plaisir y Aktion Club Sonrisa. Service Leadership Program” ta e programanan patrocina pa Kiwanis Club of Aruba na e scolnan caminda ta siña e hobennan for di tempran liderazgo, con pa traha den ekipo, organisa proyecto- y eventonan pa recauda fondo, y e importancia pa duna bek y contribui cu e comunidad.
Presidente Edalitza Weller ta gradici tur e miembronan pa nan tempo, amor y dedicacion. Alabes ta gradici tur compania of persona, cu di un of otro manera a contribui y aporta na Kiwanis Club of Aruba durante aña 2018 – 2019. Di e forma aki e miembronan por a sigui eherce nan pasion cu ta trabou boluntario y asina sigui aporta na un manera positivo na pais Aruba.
Presidente actual Edalitza a wordo reeligi y lo sigui sirbi como presidente di Kiwanis Club of Aruba, cu ta cumpliendo na luna di november benidero 55 aña sirbiendo e muchanan y comunidad di Aruba. Ta desea e directiva completo hopi exito.