Caya St Eustatius – Diasabra merdia pasa di 12’or di merdia polis a efectua varios detencion na San Nicolas.
Esaki tawata en coneccion cu maltrato di e Sindicalista Coby Geerman y su ruman.
E caso lamentabel aki lo a sosode patras di e Rumshop cerca di Watertoren.
Nos no sa kiko exactamente a causa e problema entre e sindicalista y e grupo conoci pa Husticia.
Cos a bay for di man y aki ta unda e sindicalista a haya boter den cabes y despues a bay suela. Ariba suela e maltrato lo a continua, y aki tawata unda alarma a wordo bati pa un pelea serio.
Tanto polis y recherche a presenta na e sitio.
Pero ya esnan cu a comete e acto a core drenta un adres den e Caya St.Eustatius mes.
Segun nos a compronde, autoridad lo a haci varios intento pa convence e agresornan pa sali y responde pa nan acto, pero sin resultado.
No a keda nada pa contact Ministerio Publico y despues di haya luz berde polisnan a kibra porta di e cas y drenta efectuando e detencionnan.
Total tres persona a wordo deteni na e adres den Caya St.Eustatius. Tur a wordo Transporta pa warda di San Nicolas.
Pa loke ta Sr Geerman, tanto e y su ruman lo mester a haya tratamento medico.