Malesanan di higra tin varios, sinembargo tur tin e mesun final si nan no wordo trata na tempo. Esaki sigur tin di haci cu nos bida diario, con nos ta hibe. “Stima bo mes te den bo higra” ta titulo di e anochinan di informacion di Lever Stichting Aruba. E meta di e anochinan informativo aki ta pa informa e pueblo di Aruba tocante e diferente malesanan di higra, en especial esunan mas comun na Aruba. Tambe e causa di e malesanan aki, sintomanan, con pa preveni esakinan y tambe con pa trata cu nan. Ta splika tambe tocante posibilidad di transplante di higra, tips di nurtricion adecua y e structura di e organo valioso aki.
Lever Stichting Aruba a tene su prome dos anochinan na MFA Santa Cruz y Savaneta y ta hopi satisfecho cu e reaccion ricibi. E siguiente anochinan di informacion lo tuma lugar na MFA Noord dia 12 di September pa 7or anochi y tambe na MFA Paradera dia 19 di September pa 7or anochi.
Durante e anochinan aki lo tin presentacion di Lever Stichting Aruba, storia di bida real y tambe dokter specialista di higra. Esnan presente por haci preguntanan y tambe lo ricibi informacion adicional.
Lever Stichting Aruba ta invita un biaha mas henter e pueblo di Aruba pa asisti na e anochinan informativo y asina haya sa un tiki mas tocante un topico hopi importante pa bo salud y bida diario.
Pa mas informacion por bishita nos pagina di facebook of pagina web mihigra.com.