Hooiberg – Diabierna pa mas o menos 12’or y 15 di merdia, polis y ambulance a wordo notifica di un accidente serio entre un brommer y auto, riba e caminda prinicipal di Hooiberg.
Mesora varios unidad di polis a wordo manda na altura di Hooiberg Store, caminda e accidente a caba di tuma lugar.
Na yegada nan a topa cu e motoclista benta ariba caminda, cu corta serio na su brasa y tambe posibel fractura na e mesun brasa.
Na e sitio nan a bin compronde cu loke a sosode tawata cu e brommer tawata bayendo direccion Cumana y ta haye confronta cu un señora tras di stuur di un Toyota Yaris cu a bira su dilanti. E señora a bira na su man robes sin duna e brommer preferencia.
E brommer a dal na e banda drechi di e auto, na e parti patras. Durante e impacto, un brasa di e motociclista a pasa door di e glas patras, heridando su mes seriamente.
Algun minuut despues cu polis a yega na e sitio a presenta dos ambulance. E paramediconan a haya e homber na tino y por a comunica cune.
Despues cu nan a stabilisa e motociclista, nan a transporte pa Hospital.